U-Capitec uphendula ngokulahleka kwemali
EZABATHENGI
KULE nyanga sengithole izingcingo eziningi ezivela kwabahola izibonelelo zikahulumeni bekhala ngokuthi imali yabo ikhishwe ngabanye abantu besebenzisa amakhadi amasha.
ISouth African Social Security Agency (Sassa) iyaphenya ngalezi zigameko.
Yize abantu bengakayitholi imali yabo kodwa uma bebika kuvulwa icala ukuze uphenyo lubheke ukuthi kwenzeke kanjani ukuthi imali ikhishwe wumuntu ongafanele.
Abanenkinga yokuthi kukhishwe imali yabo yesibonelelo sikahulumeni bayacelwa ukuthi babike kwaSassa noma bashayele u-0800 60 10 11 noma u-033 846 3400.
Asidlule kwezakwaSassa, iNational Credit Regulator (NCR) ixwayisa abantu ukuthi bangasebenzisani neCharis Financial Services ngoba ayibhalisiwe ngokusemthethweni.
Le nkampani isebenzela eMgungundlovu futhi ibolekisa ngemali.
UNkk Jacqueline Peters ophethe ezokuphenya nomthetho kwiNCR ukhumbuze izinkampani ezibolekisa ngemali ukuthi kufanele zibhalise ngokusemthethweni ngaphambi kokubolekisa ngemali ukuze zilandele imithetho.
Ucele abantu ukuthi ngaphambi kokuboleka imali babheke ukuthi izinkampani abaya kuzo zibhalisiwe yini ngokusemthethweni ngokuya kwi-website yeNCR ethi www.ncr.org.za noma bathinte iNCR ku-011 554 2600/2700 ukuthola kabanzi ngezinkampani ababoleka kuzo.
Bese ziningi izikhalo kubathengi ngezinkinga abahlangabezana nazo ebhange iCapitec.
Ithimba elibhekelele abezindaba eCapitec ligcine liphendulile emuva kokungiziba cishe unyaka wonke uma ngibhala ngezinkinga zabathengi.
Umbuzo: Ngilahlekelwe wuR12 000 kwi-akhawunti yami ngo-Ephreli eCapitec ngabika emaphoyiseni nasebhange kodwa imali yami ayikabuyi namanje
Impendulo: Silithintile ikhasimende salibhalela nencwadi esingakwazi ukukhombisa yona ngoba iyimfihlo ephakathi kwethu nalo. Okwenzekile wukuthi ikhasimende liqolwe kusetshenziswa iselula futhi lishilo ukuthi iselula yalo yalahlekelwa yi-network. Ngebhadi asikwazi ukulinxephezela kodwa sizolandela uphenyo lwamaphoyisa nathi sizophenya silandela imigomo ka-Ombudsman for Banking Services. Siyacela amakhasimende aqaphele ngoba lolu hlobo lobugebengu lwenzeka uma izinombolo eziyimfihlo zingagciniwe ngendlela efanele noma zinikezwe abantu abangafanele.
Umbuzo: Ngilahlekelwe wuR5000 kwi-akhawunti yami yakwaCapitec ngibikile egatsheni eliseBergville kodwa angisizakalanga.
Impendulo: Silithintile ikhasimende ngoMashi salichazela ukuthi elikushoyo asihambisani nakho kodwa aligculisekanga ngale mpendulo. Sibe sesilicela ukuthi lidlulisele udaba lwalo ku-Ombudsman for Banking Services.
Umbuzo: Ngilahlekelwe wuR10 000 kwaCapitec ngithe uma ngiya ngathola ukuthi oyithathile ubesebenzisa i-app yakhona ebhange. Ngibike egatsheni elikuJoe Slovo eThekwini.
Impendulo: Sithole ukuthi ikhasimende alizange lisheshe libike ngesikhathi kuthathwa imali kwi-akhawunti yalo. Asikwazi ukuyibuyisa ngoba yathathwa kwi-akhawunti yalo kusetshenziswa i-app ne-pin yalo futhi leyo mali yasetshenziswa ngokushesha. Sizimisele ukunika amaphoyisa yonke imininingwane ayidingayo. Silicelile ikhasimende ukuthi livule icala emaphoyiseni ukuze sizothumelela ibhange okwakhishwa kulo imali yalo imininingwane ukuze nalo likwazi ukuthola umuntu oqole ikhasimende lethu.
AbakwaCapitec babe sebenika abantu lawa masu ambalwa uma beqoliwe:
-Sicela abantu bathinte iCapitec ngokushesha ngoba sinesikhungo esisebenza amahora awu-24, bangashayela inombolo ethi 0860 10 20 43/ 021 941 0770 noma ethi +27 21 941 1377 uma bekwamanye amazwe.
Bangathumela ne-email kuClientCareCentre@ capitecbank.co.za
-Uma benganeme ngesisombululo sethu bangashayela u-Ombudsman for Banking Service ku-011712-1800 naku-0860 800 900 noma bayivakashele ku-http://obssa.co.za
Uma udinga usizo lwezabathengi ungathumela i-email kuboniswa.mohale@inl. co.za