Kasinawo amandla okunika abadala ibhonasi: ikomidi
USIHLALO wekomidi leziMali ePhalamende, uMnuz Yunus Carrim, uthi bayazwelana kakhulu nabantu abadala baseMgungundlovu abacele uhulumeni ukuthi abakhokhele ibhonasi ngoDisemba kodwa abanawo amandla okwenza lokhu.
UCarrim uthe bazitholile izethulo zePietermaritzburg Pensioners Forum abadala abebekhale kuzo ngokuthi yincane imali yempesheni kodwa iba ncane kakhulu uma kuwuDisemba ngoba kufanele bathenge ukudla kukaKhisimusi, bathengele nabazukulu izimpahla.
UNkk Thoko Ngubane (64) wakwaMpumuza, eMgungundlovu, uthe waya ePhalamende ngoba uhlala nengane engasebenzi nabazukulu abathathu, okwenza kube nzima ukuphila ngempesheni yakhe.
“Kunzima ngoba kufanele ngithenge igilosa, ngikhokhele ugesi namanzi. Imali yami isuke isiphelile emuva kokwenza lezi zidingo. Siyafisa ukuthi uhulumeni asiphe ibhonasi ngoDisemba ngoba izingane zisuke zisekhaya nokudla kuyashesha ukuphela,” kusho uNkk Ngubane.
Uthe nesibonelelo sezingane esiwuR410 sincane kakhulu ngoba abazali bazo abasebenzi bancike kwabadala ukuthi babalekelele.
UCarrim uthe bayazwelana nabantu abawu-17 million abathola izibonelelo zikahulumeni kodwa bazocela uNgqongqoshe weziMali ukuthi anyuse izibonelelo ngemali ethe xaxa ngonyaka ozayo ngoba bayazwelana nabadala.
“Kuzoba nzima ukuthi uhulumeni aphe abadala ibhonasi ngoDisemba ngoba imali yabo isuke ifakwe kwisabelomali sangoFebhuwari. Siyazwelana nabo kakhulu ngoba nesimo somnotho asisihle. Sizocela uNgqongqoshe weziMali ukuthi anyuse izibonelelo zikahulumeni ngonyaka ozayo ukuze abadala bakwazi ukuthola imali engconywana,” kusho uCarrim.
Uthe bacelile nokuthi indaba kaphethroli onyuka njalo ifakelwe izibuko ngoba yenza kube nzima ukuphila ikakhulukazi kwabampofu.