Injabulo etakulwa ngomlenze oxhunywayo
AWUKAKHOLWA umndeni wesalukazi saseNanda esinikelelwe umlenze kaR70 000 ngusomabhizinisi odume ngokuphekela imicimbi, obese kuphele iminyaka emibili singakwazi ukuhamba.
Umndeni kaNkk Ntombi Hlongwane (63) waseNewtown A, eNanda ubonga isihe sikaNkk Nto Majozi weNto’s Catering owathinteka ngenyanga edlule emenywe esontweni okusonta kulo uNkk Hlongwane.
UNkk Majozi kuthiwa wayemenywe ukuzokhuluma nabesifazane emcimbini wabo eNational Baptist Church eMlaza, wathinteka ebona uNkk Hlongwane.
Indodakazi yakhe uNksz Zethu Hlongwane ithe unina kungathi uyaphupha njengoba usezozihambela ngemuva kokusebenzisa isihlalo esinamasondo.
“Umama unoshukela, kwatholakala ngo-2016 ukuthi umlenze unophoyizeni kumele anqunywe. Wanqunywa kusuka edolweni, obekwenza kube nzima ngoba usemdala futhi mkhulu ngomzimba.
“Ubevele engasebenzi, ubaba engunogada naye kwadingeka ayeke umsebenzi ukuze anakekele umama,” kuchaza uNksz Hlongwane.
Uthe nabo babengakholwa ngesikhathi uNksz Majozi ethi uzomnikelela ngomlenze. Kumanje uNksz Hlongwane uqeqeshelwa ukuhamba ngomlenze wokufakelwa eMhlanga Medical Centre.
“Odokotela bathe kumele awujwayele ukuze akwazi ukuzihambela ngawo. Sicabanga ukuthi kuzophela le nyanga esehamba ngawo ngoba sesiwubonile, kwakhokhelwa zonke izindleko.
“Siyabona kwakuyicebo likaNkulunkulu ukuthi kumenywe usisi Nto ukuze abone isimo sikamama,” kuchaza uNksz Hlongwane.
Uthe naye ubenaso isifiso sokuthi unina afakwe umlenze kodwa engenawo amandla.
Uveze ukuthi uma eya ethoyilethi bekumele asebenzise induku enemilenze emine, nayo ebimhlula abuye awe.
Kuthintwa uNkk Majozi uthe unembeza wakhe ubuzomlahla ukube akanikelanga.
“Ngathinteka kakhulu ngoba lo gogo wasukuma washumayela ehleli esihlalweni esinamasondo. Ngathola ukuthi akaphuthi esontweni phezu kwesimo sakhe.
“Ngabona ukuqina kokholo lwakhe ngoba omunye angahlala ekhaya uma engasakwazi ukuhamba. Bekumele ambone nakimina uNkulunkulu yingakho ngimnikelele,” kusho uNkk Majozi.
Uthe wabuye wathinteka kakhulu uma ezwa indodakazi kaNkk Hlongwane ithi isaqongelela imali yokuthi ngelinye ilanga ibonge unina ngokumfaka umlenze.