ULarsen ukhale ngokulahla kwe-Arrows ithuba
UKHALELE ukulahla ithuba lokuxina amaqembu angaphezulu kwabo umqeqeshi weLamontville Golden Arrows, uClinton Larsen, behlulwa kowe-Absa Premiership ngempelasonto.
I-Arrows ishayelwe ekhaya yiBaroka FC ngo 2-1 emdlalweni obusePrincess Magogo Stadium, KwaMashu, ngoMgqibelo ntambama.
Abafana Bes’thende yibona abahambe phambili kulo mdlalo ngegoli likaLerato Lamola kodwa iBaroka ibuyile kungakayiwa ekhefini ngegoli likaJemondre Dickens.
UVusi Sibiya uthole elesibili sekubuywa.
Ekhuluma nabezindaba ngemuva komdlalo, uLarsen uthe uphoxekile ngomphumela ngoba ubebadonse ngendlebe abadlali ngokubaluleka kwamaphuzu amathathu.
“Likhulu leli thuba esilidedelile. Sikhulumile nabadlali ngaphambi komdlalo sibatshela ukuthi uma namuhla (ngoMgqibelo) sithola amaphuzu amathathu sizokwazi ukuvula igebe lamaphuzu okungenani ayisikhombisa emaqenjini eza ngemuva kwethu.
“Ngokufanayo uma siwina sizokwazi ukunciphisa igebe ngamaphuzu amabili emaqenjini asendaweni yesithathu neyesine angaphezu kwethu. Ngakho uma ngibheka ngaleyo ndlela siphoxeke kakhulu,” kusho uLarsen .
“Ngesikhathi sihamba phambili ngo 1-0 bekumele sishaye elesibili nelesithathu ngoba besibaphethe kodwa asikwenzanga lokho. Singenelwe ngamagoli amabili alula. U(Siyanda) Zwane ushibilikile ebhokisini, basebenzisa lelo thuba bashaya igoli.
“Kwelesibili kube yiphutha likanozinti. Phezu kwalokho sibe nawo amathuba esiwombeni sokuqala nesesibili. Ngakho uyadumaza umphumela esiwutholile ngoba silahle ithuba, hhayi ngoba kuwukuthi sidlale kabi.”
I-Arrows ayenzi kahle ekhaya selokhu kuqale isizini nokungesinye sezizathu esenza ukuthi ingahlali kahle kwi-log.
ULarsen uthe emidlalweni abazoyidlala uma sekubuywa ekhefini leFifa bazimisele ngokwenza kangcono ukuze kuyiwe emaholidini besendaweni “ehloniphekile.”
“Ungathi abadlali bami baba nokukhululeka uma bedlala ekuhambeni kunasekhaya. Sinamaphuzu awu-12.
“Sinayisishiyagalolunye esizowadlalela ngaphambi kwekhefu (likaDisemba). Sizozama ukuthi siwathathe ukuze kuphele unyaka sihleli endaweni ehloniphekile. Sinezinsuku eziwu-21 ngaphambi komdlalo wethu olandelyo sizozisebenzisa.”
Uthe phakathi kwezinto abafuna ukuzilungisa wukushaya amagoli ngoba uyakholelwa ekutheni iqembu lakhe lidlala kahle.