Uphoxwe okwenzeke bedlala neDowns
USALE edangele umqeqeshi we-Orlando Pirates, uMilutin “Micho” Sredojevic, ngempatho abayithole kwiMamelodi Sundowns emdlalweni we-Absa Premiership obuseLoftus Versfeld Stadium, ePitoli, ngoMgqibelo.
ISundowns nePirates bagcine bedlale ngokulingana ngo 0-0 kulo mdlalo obekubhekwe lukhulu kuwona. Nokho okwenzeke enkundleni akukhona abalandeli abahambe bekhuluma ngakho. Izidubedube nokubambana ngezihluthu phakathi kwamabhentshi womabili kwenze isimo saba muncu.
Ukuklwebhana kuqale ngaphambi kokuqala komdlalo ngesikhathi onogada benqabela ibhasi lePirates ukuthi lingene enkundleni. Bengakangeni abadlali kuphinde kwasuka esinamathambo emabhentshini kwaba nesixakaxaka esingaqondakali. Umdlalo usuphakathi kusukile futhi lokho ngesikhathi umlandeli weSundowns eqonda ebhentshini lePirates esho ukuqeda ngephini uRulani Mokwena. Ibhentshi leSundowns liqonde khona yabambana.
UMicho uthe lokhu kubi ngoba uma iFIFA imbuza ngebhola laseMzansi ukhuluma okuhle kodwa.
“Umdlalo weMamelodi Sundowns ne-Orlando Pirates kade waba khona futhi usazoba khona eminye iminyaka. Kodwa kuyishwa okwenzeke ngaphambi komdlalo, ngaphambi kokufika kwethu nasemdlalweni. Siphoxekile ngendlela iSundowns eyenze ngayo ngoba akuyona indlela yokwenza yeqembu elikhulu. Uma abalandeli benza okuthize benza izinto ngendlela yabo. Lokho uyakuqonda ngoba wonke umlandeli unelungelo lokuzwakalisa uvo lwakhe. Kodwa uma lokho kwenziwa umuntu weqembu (kuyamangaza). Uma iqembu lami lenza kanjena ngingaphatheka kabi. Lokhu abakwenzile, ukusixukuza imiqondo, bakufunde e-Afrika, siyakwazi,” kusho uSredojevic.
“Ngikholwa wukuthi uMotsepe akajabule lapho ekhona ngoba kujivazwa iqembu lakhe. Empilweni yami sengihambe izindawo eziningi. Ngifunde isifundo esisodwa ukuthi akubalulekile ukuthi kuthiwani kodwa ukuthi ubani okhulumayo. Ngaphambi komdlalo sibingelelene noPitso neqembu lonke kodwa kube yishwa okwenzekile.”
UMicho uphinde waphawula ngenkulumo kaBongani Zungu esuse emsindo ezinkundleni zokuxhumana ngesonto eledlule. UZungu ubencoma iphini likaMicho, uRulani Mokwena, ethi uyena obeke iPirates esicongweni. Uxolisile ngokuhamba kwesikhathi.
“Uma umdlali engimakhile uNemanja Matic (Manchester United) engenza lokhu kunoma yimuphi umqeqeshi, ngingamshaya ngempama. Angazi ukuthi kubaluleke ngani kodwa yimina umqeqeshi. Nginethimba eliqinile eliholwa yiphini lami uRulani futhi ngijabule ngalokho. Kuyishwa okwenzekile kodwa ngeke ngande kakhulu ngakho. Ngikholwa wukuthi sekudlulile. Wonke umuntu unelungelo lokubeka umbono wakhe. Asiyekele ibhola kube yilona elikhulumayo.
Khonamanjalo, iPirates iqhathwe neLight Stars yaseSeychelles emdlalweni wokuvula weCAF Champions League ngoNovemba 27.