USuthu luhlulwe amagoli lubhekene nePololwane City
Ngemuva kokuphucwa amaphuzu lwasala nephuzu elilodwa kwayisikhombisa elase liwaqoqile. AmaZulu aseqhube imidlalo engaphezu kweyisithupha enganqobi. Asaqoqe amaphuzu ngokudlala ngokulingana. Emidlalweni esele yomzuliswano wokuqala weligi kwemithathu azobe esekuhambeni neHighlands Park, Chippa United neLamontville Golden Arrows.
Ukuzama ukuguqula isimo, umqeqeshi, uCavin Johnson, izolo ubophele uSiyabonga “Bhele” Nomvethe oqale umdlalo okokuqala kule sizini futhi ubethanda ukuba wuhlupho ngakwesokunxele, yize egcine emdonsela ngaphandle esiwombeni sesibili wafaka uJabulani Ncobeni.
Ebuzwa ukuthi uNomvethe akamdlalisi ngani njengoba izinto zingahlangani kuMaZulu uJohnson ubelokhu emile kwelokuthi akekho umdlali ongenayo indawo eqenjini lakhe.
Indlela adlale ngayo uBhele, ozowabeka emgibeni amakhokho ekupheleni kwesizini, ayikhombisanga ukuthi usengumuntu osebheke empeshenini.
AmaZulu abesilawula isiwombe sokuqala okufakazelwe amathuba angcono awatholile okushaya igoli. Iningi lawo ehlele uBongi Ntuli nokho wahluleka wukuwasebenzisa.
Umqeqeshi weCity, uJozef Vukusic, osanda kuchonywa uphaphe njengobashaye bonke emakhanda ngo-Okthoba, ukhethe ukuhlala emuva ukuze ahlasele sakuzumisa uma sebehlokoloze imizamo yoSuthu obelingqongqoza luphindelela. Isiwombe sesibili siqale ngeCity ihlasela. UVusumuzi Mngomezulu ugeje elihle ithuba kade ethole ibhola alifakelwe uMohammed Anas.
UNtuli ubelokhu eqhubekile nokuhlalisa nzima izitobha zeRise and Shine kodwa zaqhubeka zamnyama izinto ibhola lishaya ipali. Omunye umdlali odlale ngomsebenzi ngu-Ovidy Karuru ohluleke wancama ukweqisa ibhola kunozinti wezivakashi, uHarold Ndlovu, esebhekene naye yedwa. Kuthe seliyozilahla kunina, uSiyabonga Mbatha woSuthu obeyisibukeli isikhathi esiningi, wakhombisa ukuphaphama evimba elibi ibhola ebelishaywe uMbulelo Wagaba.