USolinas ukhale ngokubhacaza kweChiefs
“NGIPHOXEKILE ukuthi kasiwatholanga amaphuzu amathathu, ikakhulukazi ngoba iPirates neSundowns badlale ngokulingana”.
Lawa ngamazwi omqeqeshi weKaizer Chiefs, uGiovanni Solinas, obekhala ngokubhacaza kwezakhe zilahla amaphuzu amabili awabize ngabalulekile zidlala ngokulingana neChippa United eMoses Mabhida Stadium ngoMgqibelo.
Amakhosi abambane kwancane indawo neChilli Boys umdlalo waphela ngo 0-0 enkundleni ebingenabalandeli ngoba iChiefs isakhokha isigwebo sePremier Soccer League.
Emdlalweni wezimbangi ezinkulu zeChiefs, i-Orlando Pirates, neMamelodi Sundowns nakhona kube wokufanayo umdlalo uphela ngo 0-0.
Ukube ezikaSolinas ziwathole ephelele amaphuzu kwiChippa bezizokhuphukela endaweni yesithathu kwi-log, ngoba bezizoba namaphuzu awu-20.
Njengamanje Abafana Bokuthula Noxolo basendaweni yesihlanu kwi-log ngamaphuzu awu-18 emidlalweni ewu-13.
IPirates iyona eqhwakele ngamaphuzu awu-23 emidlalweni efanayo kuthi Abafana Ba Style babe sendaweni yesine ngamaphuzu awu-18. Nokho amaBrazilians kuzowaqinisa idolo ukuthi asadlale kuphela imidlalo eyishumi.
“Bekufanele sithole amaphuzu aphelele kulo mdlalo ukuze sivale igebe namaqembu asesicongweni ikakhulukazi iPirates neSundowns.
“Bekufanele siyisebenzise intuba yokuthi izimbangi zethu zidlale ngokulingana.
“Kodwa ibhola linjalo, okuhle wukuthi bekungekhona ukuphela kwiligi namuhla (esho ngoMgqibelo). Iseminingi imidlalo esisazoyidlala. Kufanele siqhubeke nokuzethemba, kwazi bani mhlawumbe sizokwazi ukunqoba imidlalo eminingi kulandelana sivale igebe,” usho kanje uSolinas.
Bese kungokwesibili iChiefs idlala ngaphandle kwabalandeli enkundleni efanayo.
Ishaywe yiPolokwane City ngo 1-0 ngo-Okthoba 6. Isigwebo saMakhosi sithi kufanele adlale imidlalo emithathu ngaphandle kwezihlwele. Kule midlalo emithathu, iPSL yalengisa owodwa.
Ngokusho kukaSolinas, akuyona neze into enhle ukudlala ngaphandle kwezihlwele futhi nabadlali bayaphazamiseka ngokomqondo.
“Akulona ibhola nhlobo ukudlala ngaphandle kwezihlwele.
“Ibhola lidlalelwa ukujabulisa abalandeli, manje uma kuthule enkundleni akukuhle neze. Nabadlali uyababona ukuthi bayashayeka ngokomqondo futhi abagqugquzeleki nhlobo,” kuqhuba uSolinas.
Umdlalo olandelayo weChiefs izowudlala nomkhaya iPirates kowandulela owamanqamu emqhudelwaneni iTelkom Knockout (TKO).
Umdlalo uzodlalelwa eMabhida ngo-Novemba 24 ngo-3 ntambama.