Kugqugquzelwa abasakazi kowezindondo
ISIKHULU semiklomelo yemisakazo amaLiberty Radio Awards, uLance Rothschild, sithe abasakazi badinga ukwelulekwa ukuze lizonyuka izinga lokusakaza.
“Imisakazo yenza kahle yona kodwa ngicabanga ukuthi okushodayo wubuholi obuqotho nokuqeqeshwa kwabasakazi. Uma bengeluswa kahle belulekwe, izinga lingaba phezulu kakhulu,” kusho uLance.
Uthe imiklomelo yabo izuzisa abalaleli kakhulu ngoba igqugquzela ukuthi abasakazi basebenze ngokuzikhandla.
“Abasakazi benza umsebenzi omuhle ngoba bazi ukuthi kukhona umvuzo oyile miklomelo.
“Nathi uma sihlunga sisuke sibheka okuyibona abenza into ecokeme nokuyinto ezuzisa umlaleli ekugcineni,” kuchaza uLance.
Ugqugquzele abasakazi ukuthi bangenele imiklomelo yakulo nyaka ngoba kuyavalwa ngoJanuwari 25. Ukwamukela imingenelo kuvulwe ngoNovemba 5 wonyaka odlule.
“Ngokujwayelekile abantu bathumela kakhulu imingenelo yabo ngalesi sikhathi. Kulo nyaka sinabantu abaningi ababhalisile futhi ingena ilakanyana manje. Ngikhuluma nawe nje kusukela ebusuku kuze kube yimanje (esho izolo emini) sekuthumele abantu abangu-14. Lokhu kusho ukuthi kuhamba kahle yonke indawo kusukela kwabasebenza eziteshini zomphakathi, ezingenisa inzuzo nezasemanyuvesi. Kubonakala sengathi kuzoba wunyaka omuhle futhi nalona,” kusho uLance.
Uthe abasakazi abathumele ngoba bayakwazi ukulungisa imingenelo yabo uma lungakafiki usuku oluwumnqamulajuqu.
Emiklomelweni yangonyaka odlule kwahlonishwa umsakazi woKhozi FM uDudu “Lady D” Khoza, ingwazi yeMetro FM uWilson B Nkosi nabanye ngokufakwa kwiHall of Fame.
Imiklomelo ijwayele ukuba ngo-Ephreli.