Akukacaci ngefilimu iZulu Wedding
BASAZOLINDA abathandi bamafilimu kuleli ngaphambi kokuthi babuke iZulu Wedding njengoba abadidiyeli bayo bethi abanalo usuku oluqondile ezophuma ngalo yize sebeqede konke ngayo.
Le filimu sekunesikhathi kukhulunywa ngayo njengoba kwavela ukuthi izophuma ngoFebhuwari wonyaka odlule nokuyinto eyagcina ingenzekanga. Kwaphinde kwavela ukuthi izodedelwa ngo-Ephreli kodwa kwabuye kwahlehliswa.
Umdidiyeli wefilimu uLineo Seleoane uthe sebeqede konke ngayo.
Phambilini wathi baba nenkinga yokushoda ngemali kodwa kwagcine kuhlangene njengoba baze baqopha iziqephu zokuvula ifilimu eNew York.
“Iziqephu siziqophile futhi kwadidiyelwa. Siqede yonke into manje,” kusho uLineo.
Uthe manje balinde ukuthola izinsuku ezokhonjiswa ngazo ema-cinema.
“Izophuma kulo nyaka yona kodwa angikakabi nalo usuku oluqondile. Sisalinde abama-cinema basinikeze izinsuku ezikahle. Sisasebenza futhi ukuthola nabazoyisabalalisa kahle. Cishe kuzohlangana emasontweni azayo,” kuchaza uLineo.
Le filimu ikhuluma ngoLou (28) otshelwa ukuthi uzokwenziwa umhlatshelo wezono zabazali bakhe ngokuthi ayogana inkosi yesizwe samaZulu.
Sekushone abazali bakhe uyatshelwa ngalesi sinqumo abalekele e-USA.
Uthembisana umshado noTexas Walker noyisoka lakhe lokuqala. Uma esebuyile ekhaya uya enkosini ukuyoyincenga ukuthi adedelwe ashade noTexas.
Indawo kaLou idlalwa nguNondumiso Tembe. Abanye abalingisi ngoPallance Dladla onguMntwana uZwelibanzi Zulu, Jerry Phele odlala indawo kamalume uPhineas Sabata, Kgomotso Christopher onguRene, Lorcia Cooper onguMarang, DJ Tira, Kelly Khumalo onguYvonne Sabata, Sthandiwe Kgoroge ongu-anti uNobantu nabanye.
Ngonyaka odlule kukhishwe incwadi iZulu Wedding esuselwe efilimini ebhalwe nguDudu Busani-Dube.