Abakhubazekile bafunda bempintshene
ABAFUNDI besikole sabakhubazekile eMlaza bafunda beminyene emakilasini ngenxa yokuthi kusalungiswa izindawo zokulala.
Lesi simo siholele ekutheni abanye abazali baze baphindele emuva nezingane zabo izolo eMason Lincoln, eMalandeni, ngesikhathi kusaqedelwa ukulungiswa isikole. Kwadaleka umonakalo ngesikhathi sesiphepho nezikhukhula ngoOkthoba 2017.
Usihlalo wesigungu esilawula isikole, uNkk Sibongile Mthembu, uthe ngo-Ephreli nyakenye isikole saqala ukulungiswa emuva kokuba kuqokwe inkontileka ezokwakha.
“Satshelwa ukuthi kuzophela izinyanga eziyisithupha sekuphelile ukulungiswa kwesikole kodwa kwangenzeka. NgoJuni izingane zabafana zazilala emakilasini kulungiswa izindlu zazo, zabuya emaholidini kungakaqedwa. Emuva kwamaholidi kaJuni kwaphinde kwabhidlizwa izindlu zokulala zamantombazane namahhovisi othisha nothishanhloko. Akaqediwe kumanje,” kusho uNkk Mthembu.
Uthe izingane ziqale ukufika ngoMsombuluko ngoba ezinye zisuka kude, eziseduze zaphoqeleka ukuphindela emakhaya ngenxa yesimo. Ngesikhathi Isolezwe lifika esikoleni abanye abafundi bebesafika nabazali. Ekilasini elingumahamba nendlwana bekumpintshene abafundi bamantombazane abasalinde kuqedwe izindlu zabo zokulala. Othisha bebempintshene endlini encane yamapulangwe njengoba kusakhiwa amahhovisi abo. Ikhishi nalo lisakhiwa, okwenza ukuthi kuphekelwe endlini yamapulangwe.
UNkk Mthembu uthe izindlu zokulala zamantombazane seziyaqedwa ukulungiswa kodwa inkinga wukuthi kusanda kupendwa, azikakakulungeli ukuthi sekungalalwa kuzo.
“Izingane zinokukhubazeka ezinye zincane zifunda uGrade R. Kukhona ezingaboni ezidinga ukunakekelwa okusezingeni eliphezulu. Kwakona ukuthi zibe sesikoleni kwakhiwa akuphephile,” kusho uNkk Mthembu.
Omunye wabazali abafike izolo belethe ingane nguNkk Thandeka Zende waseHarding. Ufike wababaza ukuthi isikole asiqediwe kodwa sisenjengoba sasinjalo kuvalwa. Uthe akathokozile ngesimo kodwa akukho azokwenza ngoba ingane kumele iqale isikole.
Okhulumela uMnyango wezeMfundo, uMnuz Muzi Mahlambi, uthe bakhathazekile ngesimo sabafundi. “Usonkontileka akavunyelwe ukuxhumana nesikole ngoba uthunywe wumnyango. Kumele sikhulume naye sizwe ukuthi yini inkinga. Uma ehluleka ukusebenza sizomshintsha ngoba sihlale sikwenza nakwabanye abangenzi kahle.”
Ucingo lukasonkontileka belungabanjwa wathunyelelwa iSMS engaphendulwanga.