UPandor ugxeka izitshudeni
UNGQONGQOSHE weMfundo ePhakeme, uNkk Naledi Pandor, usegxeke izinhlangano zezitshudeni ezigqugquzela labo abangenazo izikhala ukuthi baziyele mathupha kulezi zikhungo ukuze bathole izikhala.
UNkk Pandor uthe leli khwelo liyingozi ngoba lingaphazamisa ukusebenza kwezikhungo.
“Ukugqugquzela izitshudeni ukuthi zigasele ezikhungweni ziyofuna izikhala kunobungozi ngoba kungenza izikhungo zingakwazi ukusebenza. Kungancisha labo abamukelwe ithuba lokuthi bafunde,” kusho uNkk Pandor.
Ukusho lokhu kulandela ukuphawula kwe-EFF neSasco ngokuthi kumele izitshudeni ziyofuna izikhala zokufunda.
Uthe kulo nyaka amanyuvesi angu-26 azokwamukela izitshudeni ezintsha ezingu-210 801.
Zingu-322 438 izitshudeni ezizokwamukelwa emakolishi amakhono, amaTVET.
“Abafaka izicelo babazi ukuthi isikhwama esixhasa ngezimali sizovala iwindi lezicelo ngoNovemba 30. Kumele ngikucacise ukuthi izikhala ezikhona zisuke zisohlelweni lomnyango kanti kumele sigweme ukuthi kugcwale kakhulu ngoba nengqalasizinda ayikho ezingeni.”
Ugcizelele ukuthi izikhungo azikwazi ukwamukela abantu abevile ezikhaleni ezikhona.
“Akubona bonke abafake izicelo abazothola izikhala zokufunda.”
Unxuse ukuthi abafuna izikhala zokufunda ukuthi bafake izicelo kwiCentral Applications Clearing House (CACH).
“Izikhungo kumele ziyalele abafuna izikhala kwiCACH. Abafuna izikhala bangaxhumana neCACH ngeSMS ku:49200 noma basebenzise i-website ku:www. cach.dhet.gov.za.”
Uthe iNSFAS ngeke izamukele izicelo zabazozifaka manje.
“Labo abathola izikhala kwiCACH kungenzeka bathole uxhaso kwiNSFAS. Izonyuka imali yokuxhasa izitshudeni isuka kuR14.19 billion iya kuR24 billion.
Uthe bonke abebexhasiwe ngeke bayikhokhe imali yokubhalisa.
“Kulabo abasha, bazothola uxhaso uma sebesayine isivumelwano noNSFAS sebebhalisile. Izikhungo zizonikwa imali ukuze zixhase abafunda ngeNSFAS.”
Khonamanjalo; zifinyelele kwangqingetshe izingxoxo phakathi kwe-Unisa nomkhandlu wezitshudeni ngezinto eziningi ezifunwa yilo mkhandlu okubalwa ukunikwa kwesitshudeni ngasinye i-laptop noR5 000.
Umkhandlu ufuna kubhaliswe abafuna ukwenza iziqu ezehlukene, inganyuswa imali yokufunda nezinye izinto.
Isikhungo sithe abaqhubeke babhalise nge-internet.