Kuzocacisa ukuhlolwa kwesidumbu
zivele emuva kwenyanga ingcwatshiwe intombazane okuthiwa isidumbu sayo asizange siyiswe emakhazeni.
Kwathi ukuba amalungu omphakathi ezwe ngezinsolo abikela amaphoyisa, kwase kwenziwa uphenyo, kwaboshwa uyise. Ubhekene necala lokuphazamisa umthetho. NgoDisemba 14 isidumbu sentombazane sambiwa ngamaphoyisa sase siyohlolwa. Kulindelwe imiphumela yokuhlolwa kwaso.
Okhulumela amaphoyisa, uLt Col Thulani Zwane, uthe kusalindwe imiphumela yokuhlolwa kwesidumbu okuyiyo ezoveza ukuthi kwaba yini imbangela yokufa.
“Njengoba ingakaphumi imiphumela yokuhlolwa kwesidumbu, icala abekwe lona uyise wezingane kusengelokuphazamisa ukusebenza komthetho ngokungawabikeli amaphoyisa ngokufa kwendodakazi yakhe, athi yawela phezu kwetshe. Uma kwenzeka imiphumela iveza okwehlukile kunalokhu icala liyobe seliyashintsha,” kusho uZwane.
Uyise wezingane kulindeleke ukuthi aphinde avele enkantolo yemantshi ngesonto elizayo.
Ungoti wezomthetho, uSolwazi uShannon Hoctor waseNyuvesi yaKwaZulu-Natal, uthe ziningi izinto ezibhekwa yinkantolo ngaphambi kokuthi ikhiphe isinqumo ecaleni elifana naleli.
Uthe kubhekwa ukuthi ngabe ummangalelwa uphile kahle yini engqondweni futhi ayikho yini ingcindezi abenayo eholele ekutheni aze angawabikeli amaphoyisa.
“Njengoba kuvela ukuthi ummangalelwa nguyise wezingane, inkantolo izobuye icubungulisise impilo yomndeni,” kusho uSolwazi Hoctor.