Abazali nothisha kumele babambisane ekufukuleni imfundo
UKUVULWA kwezikole izolo kungukuvuleka kwekhasi elisha empilweni yabafundi abathatha isinyathelo esibanyusela esigabeni esisha empilweni yabo.
Abanye bayoqala ezikoleni ezisemazingeni aphansi baphuma enkulisa, abanye sebeyoqala ezikoleni zamabanga aphezulu kanti abanye asebevele bekulesi sigaba sebeqala inyathuko ka-matric njengoba sebeyofunda uGrade 10.
Lezi zigaba zehlukahlukene kepha zonke zibalulekile njengoba zihlahla indlela yekusasa nempumelelo yomfundi.
Othisha abazokwamukela odado abaphuma ezinkulisa sengathi bangaqhubeka nesineke sokubanakekela kwazise kubuye kube nzima ukubafundisa njengoba abanye besuke besakhalela abazali babo.
Nalabo abafundisa uGrade 8 abamukela abafundi abaphuma emazingeni aphansi, mabaqhubeke nobuchule bokuguqula bathuthukise imiqondo yabafundi abasuke sebengena kwelinye izinga.
Labo abafundisa uGrade 10 sibafaka umfutho wokujiyisa imvubelo njengoba kusuke kungasasiniswa mahleza kulesi sigaba esibheke kwa-matric.
Impumelelo yokwenza lokhu kothisha kayikho ezandleni zabo kuphela kepha idinga nokuzinikela kwabazali.
Abazali badinga ukubambisana nothisha bahloniphe nemithetho yesikole neyoMnyango wezeMfundo.
Akumele abazali bayekelele izingane zabo kothisha, kumele nabo bazikhathaze ngemfundo yezingane zabo nokuziphatha kwazo ezikoleni.
Ubuhle nobubi bemiphumela ka-matric isisusa sakho sikulawa mazinga emfundo, uma kungahambanga kahle kuwona, mancane amathuba okuthi umfundi aqhamuke esegila izimanga kwa-matric.
Ngakho othisha nabazali mababambisane kule ndlela ukuze izithelo zibe zinhle.
Sengathi kulo nyaka abafundi bangagxila ekufundeni, othisha bagxile ekufundiseni, abazali babe qotho - kungabi khona ozosebenzisa omunye ukulwa impi yakhe noma ukufeza izinhloso zabo ebese kuphazamiseka ukufunda.