Uxoshiwe okhale ngonompempe
OBENGUMQEQESHI weChippa United, uJoel Masutha, ukhale ngokucindezelwa ngonompempe kweqembu ngoba litabalasa emsileni we-log ye-Absa Premieship kodwa wagcina exoshiwe izolo emini.
IChippa ihlulwe yi-Orlando Pirates ngo 4-2 emdlalweni weligi e-Orlando Stadium, eSoweto, ngoLwesibili ebusuku. Amagoli amabili angene kwiChilli Boys kulo mdlalo kube wumkhonto ogwaze ekhaya nephenathi. Bekuwumdlalo wesihlanu kaMasutha esebhentshini leChippa kusukela ethathe izintambo ku-Eric Tinkler ekupheleni konyaka odlule. Akakaze awine nowokubika. Uhlulwe kathathu, wadlala ngokulingana kwemibili. Sekuzophela umdlalo, kukhona ibhola elishaye esandleni kumdlali wePirates ebhokisini. UMasutha uthe ukholwa wukuthi bekufanele bahlomule kodwa lokhu akwenzekanga ngenxa yokuthi uma uphansi bonke abantu bakugandaya ngezinyawo.
“Uma ubheka sibhekene neWits, abantu bathi bekuyiphenathi kodwa bekungokokuqala ngibhona iphenathi efana naleya. Uma uphansi akekho okuhloniphayo, abasoze bakuphatha ngendlela efanayo. Siphathwa njengabalengelwa yizembe. Uma ubheka, unompempe akazange ayikhombe iphenathi kodwa usomuqga ophakamise iduku. Uyena futhi lo somugqa esiwombeni sokuqala ongasinikanga iphenathi ngesikhathi kubanjwe ibhola ngesandla ebhokisini esiwombeni sokuqala. Uma ubuza kuvele kuthiwe, yobe! Lezi zinto zifika sengathi zenziwa ngoba nakhu usemsileni,” kusho uMasutha.
Nakuba uMasutha ebalisa ngokucindezelwa kodwa abadlali bakhe abakhombisanga ukulwela ukuwina umdlalo, Izinto zikhombise ukuba ngcono umdlalo usuyophela ngaphambi kokuthi iPirates ishaye igoli lesine.
“Uma uphansi laphaya kunzima. Kufanele sizame ukwazi ukuthi kufanele uzinikele ngokuphindiwe ikakhulukazi uma udlala neqembu elifana nePirates elinabadlali abahle; ukwazi ukumelana nabo nokuthi unompempe akuvune kwezinye izinqumo, kufanele uqine. Angicabangi ukuthi kuzophela. Ubani ohlonipha amaqembu asemsileni? Akekho. Ubona sengathi usenzela ufefe uma usinika iphenathi. Lena yinto okufanele sibhekane nayo thina uqobo. Zonke izinsuku sihlale sikhuluma ngokuthi asilwe ngoba zonke izinsuku uzizwa sengathi udlala nabangu 13, 14, 15. Ukuyigoqa nje, kufanele sibe amadoda,” kusho uMasutha.
IChilli Boys isanda kudedela inqwaba yabadlali okukhona kubona uThabo Nthethe, Migeul Tim, Jabulani Shongwe, Buyani Sali, Thato Mokeke osejoyine iCape Town City, noJames Okwuosa oziqeqesha neHighlands Park. Kuthiwa kusele abadlali abangu-18 kuphela.
UClinton Larsen osanda kuchithwa yiLamontville Golden Arrows izolo kuvele ukuthi uyena ozovala isikhala sikaMasutha.