UHlompho kumfanele ukubalwa nezinkunzi e-Afrika: Denis
UNOZINTI weMamelodi Sundowns, uDenis Onyango, ubona kumfanele ukubalwa nezinkunzi e-Afrika ukaputeni wakhe uHlompho Kekana ohlala esala ngaphandle nasemiklomelweni yePremier Soccer League (PSL).
U-Onyango wase-Uganda, uwine umklomelo kanozinti ovelele e-Afrika, iCAF Goalkeeper of The Year ka-2018 emcimbini obukade useDakar, eSenegal ngoLwesibili ebusuku. Uyena kuphela umdlali ogijima kwi-Absa Premiership owine umklomelo waphinda wafakwa eqenjini le-CAF XI elithakwe ngabadlali base-Afrika abashaya into ecokeme emhlabeni jikelele.
U-Onyango uyena kuphela umdlali oseqenjini leCAF XI odlala ezwenikazi i-Afrika. Sekungokwesithathu iminyaka ilandelana eqokelwa kuleli qembu.
Nakuba ekujabulele ukuqokwa njengonozinti ovelele e-Afrika kodwa uthe ukuhlonishwa kumfanele nokaputeni wakhe uKekana osebenza ngokukhulu ukuzikhandla. Kumasizini amathathu edlule uKekana ubehlale eqokiwe emiqhudelwaneni yePSL kodwa abuye elambatha.
“Ukaputeni uHlompho Kekana ngicabanga ukuthi unebhadi lokungaqokwa kubadlali abaphambili ezwenikazi. Kodwa wenza kahle. Ubukeleka phansi. Ngicabanga ukuthi naye kumfanele ukubalwa nabadlali abaphezulu e-Afrika. Kodwa uyaqhubeka nokulwa. Ngicabanga ukuthi ngelinye ilanga uzowuthola umklomelo. Nakwi-PSL akatholi imiklomelo ngaleyo ndlela. Kodwa uyawubona umfutho awufakayo esebenzela iqembu neqembu lesizwe. Ngelinye ilanga kuzothela izithelo,” kusho u-Onyango.
“Ukuhlabana kwami kuzogqugquzela inqwaba yonozinti. Ngikwazile ukuqhudelana nabadlali abaphambili ezwenikazi. Ngihlomulile ngenxa yokusebenza kanzima. Kukhombisa ukuthi uma usebenza kanzima enkundleni njengonozinti kukhona umvuzo.”
U-Onyango uthe kumsize kakhulu ukubekezela engalitholi ijezi kwiSundowns, ebolekiswa kwiBidvest Wits. Ufike eMzansi ngo-2006 ezovimbela iSuperSport United.
Igcine imdedelile ngo-2010, wacoshwa yiMpumalanga Black Aces nalapho athathwe khona yiSundowns.
Mayelana nokuba kwiCAF XI uthe: “Kusho lukhulu kimina naseqenjini kanjalo nakwelesizwe ngoba ukufakwa kwiCAF XI kusho ukuthi ngenze kahle ezindaweni zombili. Ngizizwa ngihloniphekile ukuba yingxenye yomlando. Kuyangigqugquzela njengonozinti ukuthi ngisebenze kanzima ngoba awazi ukuthi ubani obukayo. Abantu bakuchoma uphaphe ngoba wenza kahle. Lokhu kungenza ngifune ukuba seqenjini lonyaka njalo. Ngakolunye uhlangothi ikhombisa abantu ukuthi ungaphumelela inqobo nje uma wena kahle enkundleni, kufanele wenze konke okusemandleni.”