‘Ukuphepha kothisha kumele kube seqhulwini’
IZINYUNYANA zothisha zithi indaba yokuphepha kwabafundi nothisha kumele ibe seqhulwini kulo nyaka emuva kokuba uthisha abulawa ngumfundi esesikoleni.
EMasakhaneni High, KwaMakhutha, kwashona abafundi ababili nyakenye emuva kokugwazana kade kunempi.
UNobhala jikelele weSadtu, uMnuz Mugwena Maluleke, uthe bazoba nomkhankaso wokugqugquzela umphakathi ukuthi uvikele izikole.
Uthe ngemuva kwezehlakalo zokungaphephi ezikoleni nyakenye, kube nengqungquthela eyayibheka izimo zokuphepha.
“Imiphakathi kumele ivikele izikole sengathi ivikela iqembu lezemidlalo elithandayo. Sifuna izikole zibukwe ngenye indlela ngoba ezomphakathi.”
Uthe bafuna iphele indaba yodlame ezikoleni ngoba uma kuhlaselwa uthisha kufana nokuthi kusuke kuhlaselwa isizwe.
“Uma othisha behlala ngokusaba emsebenzini, isizwe sihlala ngokwesaba. Uma umphakathi uthanda izikole imfundo kuba yinto ethandwa uwonke wonke.”
UMengameli weNatu, uMnuz Allen Thompson, uthe indaba yokuphepha kothisha ngezinye zezinto eseqhulwini ngemuva kwezehlakalo zokugcwelezwa kwabo.
Uthe bazohlela imashi ezoqwashisa ngokuthi kumele bavikelwe.
“Sizohlela imashi ezokhuluma ngendaba yokuphepha kwabafundi nothisha ezikoleni. Sifuna kuqashwe onogada, kubiywe kabusha izikole ngoba azibiyiwe ngendlela ezinye zazo.”
UNgqongqoshe wezeMfundo kuzwelonke, uNkk Angie Motshekga, ukhalile ngezehlakalo ezingezinhle ezenzekile ezithinta ezokuphepha nokushona kukathisha esekilasini egadile ngesikhathi kubhalwa izivivinyo.