Izonxenxa intsha i-IEC ukubhalisela ukhetho
UZOGXILA entsheni umkhankaso wokunxenxa abantu ukuthi babhalisele ukuvota, njengoba engu-285 amaqembu abhalisele ukungenela ukhetho lwalo nyaka.
Lokhu kumenyezelwe yikhomishini yokhetho kuleli i-Independent Electoral Commission (IEC) njengoba izolo ibithula umkhankaso wokhetho.
Sekulindwe uMengameli Cyril Ramaphosa ukuthi amemezele usuku lokhetho okulindeleke ukuthi lube ngoMeyi kulo nyaka.
Ekhuluma nemisakazo yakwaSABC kuleli sonto, uRamaphosa uthe ukhetho luzoba ngaphambi kukaJuni nonyaka.
Sikhuluma ngesikhathi kwethulwa umkhankaso wokhetho, isikhulu esiphezulu se-IEC uMnuz Sy Mamabolo, sithe ikhomishini isilulungele ukhetho. Uthe kumanje bamatasa nezinye izicelo zamaqembu ezingu-37.
“Umkhankaso wethu wokhetho uzogxila kubantu abasha ngoba yibona abanesibalo esincane emqulweni wokuvota. Asethembe ukuthi ngeke sibe namaqembu angaphezulu kuka-200 kwi-ballot paper.
Sesiqeqeshe abantu abangu-60 000 abazojutshwa izwe lonke, imishini yethu yokuqopha umazisi ne-smart ID engu-32 000 seyimi ngomumo. Sesiqalile ukuthumela izinsiza ezizosebenza uma sekuvotwa kuzona zonke izikhungo ezisabalele izwe lonke,” kusho uMamabolo.
Uthe mkhulu umsebenzi owenziwe mayelana nokuqoqwa kwamakheli kwabangenawo emqulwini wokuvota njengoba iNkantolo yoMthethosisekelo ibanike kuze kube uNovemba wonyaka ozayo.
“Sizoba nezinhlelo zokusiza noma ngubani ofuna ukuphikisa amagama abantu abasemqulwini wokuvota. Sinohlelo lokuthi abantu balungise noma bafake amakheli abo besebenzisa i-internet ngokuthi baye kwi-website ye-IEC. Lokhu kuzokwenza ukuthi umuntu ashintshe ikheli lakhe kube lula ngoba uzokwenza noma ekuphi.”
Uthe lude ukhalo oseluhanjiwe mayelana nokuqoqwa kwamakheli njengoba ngoMashi 2016 babengu-8.4% ababenamakheli kubantu abangu-26 abasemqulwini wokuvota wathi manje sebengu-21.5 million abanamakheli.
Uthe ngoJanuwari 26 no-27 yimpelasonto yokugcina yokuthi abantu abangabhalisele ukuvota babhalise.
Unxuse intsha ukuthi iphume iyobhalisela ukuvota ngoba yibona abantu abanesibalo esincane emqulwini wokuvota.
USihlalo we-IEC uMnuz Glen Mashinini uthule umkhankaso iXse 2019 ebhekiswe entsheni ukuze ivote. Abantu abaneminyaka engu-16 kuya phezulu abanomazisi bangabhalisela ukuvota nakuba kungabaneminyaka engu-18 kuphela abayokwazi ukuvota ngosuku lokuvota.
Khonamanjalo; uphasisiwe umthethosivivinywa i-Electoral Laws Amendment Bill, umkhandlu wezifundazwe ePhalamende izolo.
Lo mthethosisivinywa uzonqanda ukusetshenziswa kwemali kahulumeni ngaphandle kwaleyo ekhishwe yi-IEC uma kukhankaswa.