Kugqugquzelwa abalimale ezitimeleni bacele uxhaso

Isolezwe - - IZINDABA - BONISWA MOHALE

KUGQUGQUZELWA abalimale engozini yezitimela ePitoli ukuthi bafake izicelo zokunxeshelwa esiteshini kule ndawo.

Kule ngozi eyenzeke ngoLwesibili ekuseni kushone abathathu kwalimala abawu-641 kwathi abawu11 balimala kanzima.

Esitatimendeni esithunyelwe kwabezindaba iPassenger Rail Agency South Africa (Prasa) ithe abalimele nabashonelwe yizihlobo kufanele baphathe imininingwane efanele uma sebecela ukunxeshelwa. USihlalo weBhodi lakwaPrasa uNkk Khanyisile Kweyama uthe uyazwelana kakhulu nabalimele ngesikhathi ebavakashele ezibhedlela kuleli sonto, waphinde wadlulisa amazwi enduduzo kwabashonelwe.

“Kubuhlungu ukuthi kule ngozi kushone amalungu amabili omndeni owodwa, okungowesilisa nomkakhe, izingane zabo ezimbili zilimale kancane futhi seziphumile esibhedlela. Kuphinde washona nomunye oyedwa. Ingiphethe kabi le ngozi ngoba kusekhona owesilisa esingenayo imininingwane yakhe osegumbini labalimele kakhulu. Siyacela olahlekelwe yisihlobo azise amaphoyisa ngoba mhlawumbe silele esibhedlela,” kusho uNkk Kweyama.

Uthe bawu-24 abantu abalimala engozini abasalele egumbini labalimele kakhulu okuhlanganisa nomshayeli wesitimela.

“Sikhathazekile ngokumoshwa kwengqalasizinda yethu ngamasela antshontsha amakhebuli. Ukwebiwa kwamakhebuli kuphazamisa izinhlelo zethu zokuthuthukisa ingqalasizinda yokumisa izitimela. Sicele abaphathi bezitimela ukuthi baxoxe nomphakathi ukuze kube nobudlelwane obuhle kuvikelwe nengqalasizinda,” kusho uNkk Kweyama.

Lusaqhubeka uphenyo ngembangela yengozi.

Newspapers in Zulu

Newspapers from South Africa

© PressReader. All rights reserved.