Owe-ANC akanankinga nokushiya isikhundla

Isolezwe - - IZINDABA - MCEBO MPUNGOSE

UMENGAMELI we-ANC Women’s League, uNksz Bathabile Dlamini, uthi ngeke kumkhathaze ukungaveli kwegama lakhe ohlwini lwabaholi abazojutshelwa ukuyomela i-ANC ePhalamende.

Nyakenye, amaqembu aphikisayo abelokhu ekhala njalo ngokugcinwa kukaNksz Dlamini njengoNgqongqoshe wezabesiFazane eHhovisi likaMengameli ekubeni washiya izinto zimapeketwane kwaSassa esanguNgqongqoshe wezokuThuthukiswa koMphakathi.

Ukhulume lokhu ngesikhathi ubuholi be-ANC buvakashele ibandla lamaNazaretha entabeni engcwele iKhenana.

“Onke amalungu esigungu esiphezulu se-ANC aqokwa amalungu eqembu. Amagama abantu avela ohlwini ngenxa yendlela amalungu azizwa ngayo ngalabo bantu. Uma i-ANC isho okuthile ngami, ngizosilandela isinqumo sayo. Okunye, asizalwanga siwongqongqoshe, sinikezwa ithuba lokusebenzela abantu. Uma ungasajutshiwe akusho ukuthi iNingizimu Afrika izowa bhu phansi,” usho kanje.

Muva nje ibamba lomkhulumeli we-ANC, uMnuz Zizi Kodwa, lithe le nhlangano ngeke imelwe abantu asebeke balahlwa amacala. UKodwa uveze lokhu kulandela ingqungquthela ye-ANC yokudingida amagama abantu abazojutshelwa ePhalamende naseziShayamthetho.

Kuzokhumbuleka ukuthi noma engakaze alahlwe yicala uNksz Dlamini, iNkantolo yoMthethosisekelo nyakenye inqume ukuthi akhokhe u-20% wezindleko zabameli ecaleni elithinta izibonelelo zikahulumeni oluthinta ukuqokwa kweCash Paymaster Services (CPS).

Inkantolo yanquma ngo-2014 ukuthi ukuqokwa kweCPS kwakungekho emthethweni futhi kungafanele. Le nkampani yayiqokwe ngo-2012.

UNksz Dlamini kuthiwe kufanele ayikhokhe le mali ngoba waba budedengu odabeni lwale nkontileka.

Newspapers in Zulu

Newspapers from South Africa

© PressReader. All rights reserved.