Sibashayela izandla abesikole sasejele eWestville
ISIKOLE sasejele eWestville, i-Usethubeni Youth Centre, siyalibuyisa ithemba futhi siyaqinisekisa ukuthi ngempela izimilo ziyahlunyeleliswa emajele.
Lesi sikole okufundwa kuso kuze kufinyelelwe ku-matric, sesineminyaka emithathu sikhiqiza o-100% kwimiphumela ka-matric.
Kasigcini lapho kepha siphinde sathulelwe isigqoko ngokuba nesibalo esiphezulu sabaphase ezingeni le-bachelor, uma siqhathaniswa nezinye izikole ezisemajele akuleli.
Ngenxa yempumelelo yalesi sikole, uthishanhloko waso uNkk Neli Mkhize useze wacelwa ukuba ayofaka isandla esikoleni esisejele eliseMpangeni, iQalakabusha.
UNkk Mkhize nethimba lakhe sibethulela isigqoko ngomsebenzi omuhle kangaka.
Ukujeza ngokuvalelwa ejele abanye kungabalahlisa ithemba lokuphinde baphumelele empilweni kepha abafundisa emajele benza umsebenzi omkhulu wokufaka umfutho wokuqhubeka nemfundo khona ejele, okuyingxenye ebaluleke kakhulu ekuhlumeleliseni izimilo njengoba kuphucula impilo.
Ukubaluleka kwemfundo kuhlale kugcizelelwa mihla le futhi nazo ezinye iziboshwa ziyakubona lokhu uma sezivuna okuhle ngokuqhubeka nokufunda khona emajele.
Ukuhlumelelisa isimilo nganoma iyiphi indlela, hhayi emajele kuphela, akuyona into elula njengoba kusuke sekusetshenzwa nomuntu osengene ogibeni lokwenza okungafanele futhi injongo kuwukumkhipha kulo, umfake endleleni ngenhloso yokuphucula impilo yakhe.
Usikhanyisele ngobuhlakani bakhe uNkk Mkhize, othe okumsiza kakhulu ekwenzeni lokhu wumgomo azibekele wona wokuthi angafuni ukwazi ukuthi isiboshwa sidonsela siphi isigwebo, ngoba usuke efuna ukuzibona zonke zifana emehlweni akhe.
Okubalulekile kuye ngukuzifundisa zithole imiphumela ezoguqula yenze ngcono impilo yazo njengoba kuba khona eziqhubekela nasemanyuvesi.
Impumelelo yesikole saleli jele sengathi ingakapakela nakwamanye amajele, hleze inqotshwe impi yobugebengu eNingizimu Afrika.