U-Ernst akasayingeni eyokufuna unozinti
UMQEQESHI weKaizer Chiefs, u-Ernst Middendorp, akasayingeni eyokuthungatha unozinti ozovala isikhala sikaItumeleng Khune oyoze adlale ngesizini ezayo.
Ngempelasonto edlule uMiddendorp ukuqinisekisile ukuthi uKhune, olimele ihlombe, ngeke esabonakala enkundleni ngesizini ka-2018/2019. Indawo yakhe ithathwe nguVirgil Vries waseNamibia owenze iphutha eliholele ekutheni iChiefs ihlulwe yiMamelodi Sundowns emdlalweni we-Absa Premiership ngeledlule. Ngaphandle kukaVries kwiChiefs kukhona uBruce Bvuma noBrylon Petersen ababanga indawo kaKhune.
Kusabalale imibiko yokuthi Amakhosi azingela omunye unozinti. Kula bonozinti kuvele uDarren Keet weBidvest Wits owenqabile ukuvuselela inkontileka yakhe kuleli qembu, Thela Ngobeni owukudla kwebhentshi kwiSundowns noJody February we-Ajax Cape Town.
UMiddendorp uthe imthathile indlela uBvuma adlale ngayo kowobungani neqembu laseGermany iWerder Bremen ngempelasonto edlule. “Angicabangi ukuthi sizomsayinisa omunye unozinti. Engikubone ngeSonto kungichazile kuBruce. Angikaze ngikubone phambilini kuyena uma siziqeqesha. Kwesinye isikhathi bengize ngizibuze ukuthi kwanele lokhu. Kodwa engikubone ekwenza emizuzwini engu-50 sibhekene neWerder Bremen kungenze ngaba nokuthula, ngabona ukuthi sinaye omunye unozinti osezingeni eliphezulu.”
UVries ubukeke ekhululekile ngesikhathi iChiefs ihlula iWits ngo 2-0 kowePremiership eBidvest Stadium ngoLwesithathu ebusuku. Amagoli eChiefs ashaywe nguLeonardo Castro noHendrick Ekstein esiwombeni sesibili. Lo mphumela uholele ekutheni Amakhosi anyukele endaweni yesihlanu kwi-log yePremiership.
NgeSonto uMiddendorp kufanele aqhamuke neqhinga lokwehlula iZesco United yaseZambia abazobhekana nayo emdlalweni womlenze wokuqala wokuzibekisela indawo esigabeni samaqoqo seCAF Confederation Cup. Umdlalo useLevy Mwanawasa Stadium, eNdola, eZambia, ngeSonto. Kulo mdlalo Amakhosi azodlala sekubuye insika uWillard Katsande. UMiddendorp usikaza ukunikeza ithuba abadlali abangajwayele ukudlala.
“Ngijabule ngendlela esidlale ngayo neWits. Uhlaka belucacile, ngezikhathi ezifanele sashaya amagoli. Ngijabule ngengikubonile,” kusho u-Ernst.
Mayelana nomdlalo neZesco uthe: “Umdlalo neZesco unezingxenye ezimbili. Eyokuqala isekuhambeni, eyesibili iseFNB ngoMgqibelo. Sizoya kuwona sizame ukudlala ngendlela efanele ngethemba lokuthi sizowina. Emuva komdlalo wesibili kufanele singene esigabeni samaqoqo. Inhloso yethu yileyo.”