UJust Prunella uzishaya isifuba ngokuhlukile
KUFAKAZELEKE isisho esithi, ukuwa kwenye indlu wukuvuka kwenye kuDJ waKwaNdengezi owayezama ukucula kodwa kwangamlungela.
UPrunella “Just Prunella” Thusi (25) uthe wake wazama ukucula ngo2013 kodwa izinto zangalunga. “Umculo ngawuthanda kusuka kudala. Ngo-2013 ngaqopha kodwa kwakungasebenzi,” kusho uPrunella.
Le ntokazi ithe iqale ukuba wuDJ ngoSepthemba wonyaka odlule.
Uthe ngemuva kokuphothula u-matric ePinetown Girls High ngo2012, uthuthele eGoli eyofunda izifundo zomthetho eWits.
“Angiqedanga izifundo zami ngenxa yemali. Ngonyaka odlule ngithathe isinqumo sokubuyela eThekwini ukuze ngizofeza iphupho lami lokuba wuDJ. Ngibhalise esikoleni sokudijeya, i-iMix Academy ngafunda inyanga eyodwa,” kuchaza uPrunella.
Uthe akuthathanga sikhathi esingakanani wasayiniswa yiTouch Africa Records okuqopha kuyo uNaima Kay, Lasandra nabanye.
“Ngiqedile ngayocija ikhono lami ePow Academy futhi manje sengiqalile ngidlala ezindaweni ezahlukene.”
Ngempelasonto ubedlala ezindaweni zobumnandi iMashamplanez Lounge, eChesterville naseRich Durban.
Uthe yena uza nokuhlukile kwezomculo.
“O-DJ abaningi besifazane bathanda ukudlala i-hip hop negqom’ kodwa mina ngibheke ukudlala i-deep house futhi ngizobe ngizididiyelela hhayi ukuthi ngizobe ngipike abantu abathize. Ngizozakhela ingoma kusuka phansi. Abantu kumele babheke ngasekupheleni kukaMashi ngoba ngizokhipha ingoma,” kusho uPrunella.
Uthe kodwa akafuni ukuzimpintsha kwi-deep house yodwa.
Uthe uyayazi into ayizele emculweni.
“Anginake lutho olunye ngoba ngiyazi ukuthi ngifuna ukufeza iphupho lami. Uma uzama into kodwa ingasebenzi, kumele ushintshe ubheke enye oyithandayo ukuze kuzofezeka iphupho. Unganaki ukuthi abantu bathini ngoba bahlale bekhuluma.”