Imigwaqo enetiyela eyomntakabani
VS Ngidi MHLELI: Ngiyilungu lomphakathi waseTrustfeed kuWard 9, ngaphansi koMshwathi Municipality.
Sinezinkinga esigodini sakithi iJwabuzela esezisihluphe iminyaka.
Ukushoda kwamanzi, kunohlelo lokuthuthwa kwamanzi ngamaloli eyiswa ezindaweni ezintula amanzi. Selokhu kwaqalwa lolu hlelo amanzi awasaphumi kompompi. Uma kuthuke ephuma, aphuma kancane ngendlela engachazeki. Liyaphela isonto amanzi engekho kompompi. Uma uvula umpompi uhlabe ikhwela.
Le nkinga yamanzi ihlasele kakhulu izigodi ezimbili iJwabuzela noGudlucingo. Alukho uhlelo esisizwa ngalo ngale nkinga. Kunzima nokuthenga amathangi ngoba ukuze siwagcwalise kuye kufuneke ukuthi siwakhokhele oR300 kule genge eshayela amaloli. Isikhokhisa nje la manzi bawakha khona endaweni.
Inkinga yomgwaqo wobhuqu wakuzo zombili lezi zigodi ezibalwe ngasenhla.
Kushayisa amahloni ukuthi emva kokuthi leli zwe lakhululeka sisahamba emgwaqeni onjena. Kukodwa ukuthi uwubhuqu. Unemigodi nemisele. Uma uhamba ngemoto kuba ubutsegetsege ihambe inyukunyeka kule migodi nemisele.
Sihlulwa ngisho indawo yasemakhaya iSweetwaters, ikhonkwe cishe yonke imigwaqo yakuleya ndawo.
Sihlupheka kanjena nje sinalo ikhansela leWard uMbongwe. Uma ebikelwa ngezinkinga zamanzi uthi amanzi inkinga ekhungethe izwe lonke.
Mayelana nomgwaqo wathi uthi umasipala wafelwa ugandaganda wokugugula umgwaqo. Umbuzo wami-ke uthi uma lo gandaganda womkhandlu ufile alukho yini uhlelo lokuqasha omunye ngaphandle, kulethwe usizo emphakathini na?
Sikhala kanjena nje ngomgwaqo ikhansela linomuhle umgwaqo wetiyela ophela ngasemzini walo. Lento yemigwaqo ephelela emzini yamakhansela nezimeya siyayibuka nje. Asithule ngoba siyizilima. Ayiyinhle neze. Bathi basebenzela umphakathi bawuninda ngodaka emehlweni.
Bayakhohlwa ukuthi bakulezi zikhundla abakuzo nje bakhethwa yiwo lo mphakathi abawushaya indiva. Sokhulu ETRUSTFEED