Unikelele isikole owopopayi
UKUKHUTHAZA izingane ezincane ukuthi zithande izincwadi nokufunda kungazisiza ekutheni kuncishiswe isibalo sezingane ezifunda amabanga aphansi, okuthiwa azikwazi ukufunda kahle nokubala.
Lokhu kushiwo uNkk Thabisile Mthethwa wenkampani eyasungula ilebuli yopopayi abamnyama, uDudu noSipho, ngesikhathi ezonikelela abafundi baseWindy Heights Primary ngezincwadi nezikhwama ezinobuso balabo popayi izolo.
UNkk Mthethwa uthe ngaphandle kokuthi usebhizinisini lokudayisa imikhiqizo enobuso balabo popayi, uzizwa enesibophezelo sokuthi athuthukise imfundo yezingane ezincane ngokuzikhuthaza ukuthi zifunde yingakho enencwadi ebhalwe ngesiZulu nangesiNgisi. Abalingiswa abakule ncwadi nguDudu noSipho.
“Indodakazi yami uKhwezi (10) engasungula le lebuli ngenxa yokuthi ngangingabatholi opopayi abamnyama, ibhale incwadi ngale ncwadi, sikhuthaza izingane ezincane ukuthi zikwazi ukubhala izincwadi zisezincane,” kusho yena.
UGcina Mhlophe ongumbhali wezincwadi zezingane obengomunye wabantu ebebehambele kulesi sikole ekhuthaza izingane ukuthi zihaye ngezilimi zazo, uthe ivangeli lakhe alishumayelayo linye, elokuthi izingane zijwayele ukufunda izincwadi.
“Ngikholwa ukuthi ukufunda kuyayicija ingane ihlale ilangazelele ukufunda njalo,” kusho yena.
UMnuz Musa Zulu okunguye ohlanganise ithimba lababhali bezincwadi ebebezonikela ngezincwadi kulesi sikole, uthe wathola ukuthi lesi sikole sigubha iminyaka engu-30 sasungulwa, wase ebona ukuthi kungawumbono omuhle ukuthi umbhali ngamunye anikele ngezincwadi ezingu-30, ezizogcinwa kumtapo wolwazi wesikole.
UNkk Thembekile Makhanya uthishanhloko walesi sikole uthe
izincwadi abazinikelelwe ngababhali zizosiza abafundi babo ukuthi bakhulise ulwazi lwezilimi ezimbili zokuqala ezifundwa kulesi sikole.
“Sesiqalile ukuba nemincintiswano ekhuthaza ukuthi abafundi bafunde. Ekupheleni konyaka asisazikhiphi izindondo esibonga ngazo abafundi abenze kahle, abafundi abenze kahle sibanika izincwadi,” kusho yena.