Ubonga uninakhulu ongasekho ophase ngamalengiso
SIFISA ukuhlanganisa ulwazi lobudokotela nezobuchwepheshe isitshudeni esiphase ngamalengiso phezu kokushonelwa ilungu lomndeni ngesikhathi sokubhala izivivinyo.
UThabiso Ndlovu (17) waseMlaza uyokwenza unyaka wokuqala ezifundweni zobudokotela e-University of Cape Town kulo nyaka. Washonelwa uninakhulu omkhulisile ngesikhathi ebhala u-matric. Phezu kwalo mshophi uThabiso obefunda eVelabahleke High, wathola o-A abayisikhombisa noB kwiAccounting.
Ubengomunye wabafundi abebefundiswa ngaphansi kohlelo i-Engen Maths and Science School (EMSS), lokusiza abafundi ukuthuthukisa ulwazi lwabo kulezi zifundo.
“Ekhaya bengihlala nokhulu, ngakhuliswa uyena. Bengondliwa imali yakhe yempesheni, yingakho kwazwela kakhulu uma eshona sengibhala,” kusho uThabiso.
Uthe uninakhulu wayenoshukela okwenze ukuthi anqunywe umlenze kabili ngo2015 nango-2017. Ngonyaka odlule wagula kakhulu ngesikhathi uThabiso eqala ukubhala.
“Ubesephuma engena ezibhedlela, nalokho kwangiphatha kabi. Ngisho esegula enjalo kodwa ubeqinisela, engikhuthaza ukuthi ngifunde. Yilokhu okunginike namandla okuthi ngizikhandle ngisho emoyeni kungavumi,” kusho uThabiso.
Ezifundweni aziphase ngo-A uThabiso kubalwa iMaths, isiZulu, English, Life Orientation, Life Sciences, Physical Science neComputer Application and Technology.
Uthe ubevele ethanda ukuba udokotela ukuze ashintshe izimpilo zabanye abagula njengoninakhulu. Ukhethe nokuyofunda eCape Town kude nasekhaya ukuze akwazi ukuzimela. Njengoba kulezi zifundo kukhona nezobuchwepheshe, uthe uyafisa ukuthi abusebenzise ngisho ekwelapheni izifo.
Uncome uhlelo lwaka-Engen athe yilona olumsize ukuphasa ngamalengiso. Ubenamakilasi ngezimpelasonto nangamaholidi e-University of KwaZulu-Natal. Uphume isibili kubafundi abangu-532 abebengaphansi kwalolu hlelo ngonyaka odlule.
Ziyisishiyagalolunye izikhungo okufundiswa kulo ngaphansi kohlelo lwakwa-Engen kuzwelonke. Lezi zifundo ziqala kwaGrade 10 kuya kuGrade 12. Ngonyaka odlule lezi zikhungo ziphase ngo-93% kwathi ezimbili zaKwaZulu-Natal zathola u-100%.
Abafundi abathathu abebengaphansi kalolu hlelo babe sohlwini lwabaphase ngamalengiso kuzwelonke.
UNkk Adhila Hamdulay, oyi- Corporate Social Investment Manager kwa-Engen, uthe uThabiso uyisibonelo sokuthi uhlelo lwabo lusiza kanjani. Uthe bayethemba ukuthi uzokwazi ukwandisa amakhono ashodayo emkhakheni wezobudokotela.