Bazame ukubhomba iwodi bediniwe
AHLULEKE ezama ukushisa iwodi lesibhedlela iKing Dinuzulu ngebhomu kaphethroli amalungu omphakathi afuna ukuqashwa kulesi sibhedlela.
Kuthiwa amalungu omphakathi akuward 25, eSydenham afesele ukuqashwa, aphinde agadla kulesi sibhedlela ezintatha zayizolo lapho okuthiwa aphonse ibhomu kaphethroli ezama ukushisa iwodi elilapha abanenkinga yamazinyo.
Umthombo ongaphakathi esibhedlela uveze ukuthi abantu abebezama ukushisa baphazanyiswe ngonogada sebeyiphonsile ibhomu. “Basike ucingo olubiyele isibhedlela bangena base bephonsa ibhomu kaphethroli behlose ukushaya iwindi lewodi. Bahlulekile ukushaya iwindi, bashaya udonga kwagcina kushe ngaphandle. Kucishe kwayisibhicongo ngoba ukube bashaye iwindi bekuzolimala abantu kuthungeleke namanye amawodi kushe nalapho okupakwa khona izimoto. Kutholakale nezigubhu zikaphethroli lapho abangene ngakhona nokusho ukuthi bebezimisele ngokwenza umonakalo omkhulu,” kusho lo msebenzi.
Kwenzeka lokhu kusanda kuboshwa amalungu omphakathi angu-29 emuva kokuthi kushiswe indlu ehlala onogada bakulesi sibhedlela nesitolo, kwashiswa nebhasi likamasipala, kwashaywa nezimoto zabantu ngamatshe, kwalinyazwa ne-ambulensi nokunye.
Ilungu lekomiti lomphakathi, uMnuz Themba Solo Mkhize, lithe libikelwe ngokuthiwa kwenziwe amalungu omphakathi. “Akulula kithina ukuthi siwehlise umoya umphakathi ngoba udiniwe. Amalungu omphakathi azoyeka uma esethole imisebenzi eKing Dinuzulu bese kuphenywa nenkohlakalo yokuqashwa kwabantu ngobuhlobo.”
Okhulumela amaphoyisa KwaZuluNatal, uCol Thembeka Mbele ukuqinisekisile ukuthi amaphoyisa aphenya icala lokulimaza impahla.
UNgqongqoshe wezeMpilo KwaZuluNatal, uDkt Sibongiseni Dhlomo usigxekile isenzo salaba abasolwa ngokuzama ukubhomba ibhilidi lesibhedlela.