Izinkawu zikhathaza ongqongqoshe
SEKUQOKWE ithimba elizobheka isimo sokucanasa kwezinkawu esibhedlela eRK Khan eThekwini, esezihlalise kabi neziguli emawodini.
NgoLwesithathu, uNgqongqoshe wezeMpilo uDkt Aaron Motsoaledi uvakashele lesi sibhedlela ukuzohlola isimo emuva kokusabalala kwezithombe zezinkawu zicanasa emawodini, ezinkundleni zokuxhumana. Isolezwe labika ngalolu daba ngoDisemba emuva kokuba abantu bekhale ngokuhlaliswa kabi yizinkawu okuthiwa sezidla ngisho ukudla kweziguli. UMotsoaledi uthe lesi simo siyamkhathaza ngoba iziguli zintekenteke, akumele zihlukumezeke nganoma iyiphi indlela.
“Ngize kulesi sibhedlela ngoba ngibone izithombe ezinkundleni zokuxhumana. Uma kukhona ezinye izibhedlela ezinenkinga efanayo nakhona sizolubheka udaba,” kusho uMotsoaledi.
Uthe kunezifo ezingathwalwa izinkawu bese zithelela iziguli njengoba sezidla ngisho ukudla kwazo. Uveze ukuthi kuleli thimba kukhona nabezemvelo abazokwazi ukuthi kungaqedwa kanjani ukucanasa kwezinkawu.
UNgqongqoshe wezeMpilo eKZN, uDkt Sibongiseni Dhlomo, uthe sebake bazama ukulubheka lolu daba. Uthe baxhumana nabezempilo nabakwazi ukukhalima izinkawu kodwa kuyacaca ukuthi le nkinga bebengeke bayilwe bodwa.
Iziguli kuesi sibhedlela zikhala ngokuthi amawindi awanazo izinsimbi okwenza kube lula ukuthi izinkawu zingene noma yinini. Ngisho onesi bathi sebekhathele ukuphambana nezinkawu okuthiwa sezazi ngisho izikhathi zokudla. Kuze kwabekwa uphawu olubhalwe ezindongeni oluxwayisa ngazo izinkawu.
Ekhuluma nephephandaba phambilini ongungoti ekuphathweni kwezinkawu, uMnuz Steve Smith weMonkey Helpline, wathi bayazi ngenkinga yakulesi sibhedlela futhi sebahlangana
nezikhulu zesibhedlela. Uthe izinkawu aziyona ingozi futhi azinawo amagciwane,
“Empeleni yizinkawu ezisengcupheni yokuthola izifo ezigulini kodwa zona azinawo amagciwane ngokwemvelo,” kuchaza yena.