Kutheleke abefundisi bezobhula umlilo ngomthandazo eDUT
AMAPHOYISA ashaqe izibhamu ezimbili zonogada okusolakala ukuthi badubula ngesikhathi kunombhikisho wezitshudeni eDurban University of Technology (DUT) okwaphetha ngokuthi kufe isitshudeni, uMlungisi Ntombela (21) waseNgwavuma, ngoLwesibili ntambama.
Okhulumela amaphoyisa uColonel Thembeka Mbhele, ekhuluma oKhozini FM, uthe okwamanje akekho oseboshiwe mayelana nokufa kwalesi sitshudeni. “Sithathe lezi zibhamu ukuze ziyohlolwa wuPhiko lwamaPhoyisa oluHlola iziBhamu,” kusho uColonel Mbhele. Abaphathi baseDUT bacele izitshudeni ukuthi zisebenzise i-internet, zibheke nama-emails ukuthola ukuthi isikhungo sizovulwa nini.
Okhulumela lesi sikhungo, uMnuz Alan Khan esitatimendeni, uthe kusavalwe wonke amakhempasi namahhovisi.
“Isikhungo sisavaliwe okwesikhashana yingakho sikhuthaza izitshudeni ezingakabhalisi ukuthi zisebenzise i-internet. Siyaxolisa kubazali, izitshudeni nabasebenzi bethu ngokuvalwa kwesikhungo. Senza konke okusemandleni ukuzama ukuxazulula izinkinga,” kusho uKhan.
Izolo, abaphathi besikhungo bekulindeleke babe nomhlangano nomkhandlu omele izitshudeni ukuthola isixazululo kulolu daba.
Izolo, abefundisi bamabandla ahlukene nabaholi bendabuko bathandaze endaweni yesigameko. UMfundisi Mthokozisi Luvuno ubeke izimbali endaweni yesigameko, wathembisa ukuthi bazoqhubeka nokweseka izitshudeni.
Umfundisi Vusi Dube, we-Ethekwini Community Church obehola lo mthandazo, uthe bona bamele abazali okumele basondele uma kwenzeke noma yini. UMengameli weziTshudeni, uKhanyisani “Glodlimpi”Khambule, uthe bayawubonga umthandazo futhi basawudinga kulesi simo.