Isivumelwano esizosiza abaqolwa eyempesheni
SEKUSAYINWE isivumelwano phakathi kwabakwaSouth Africa Social Security Agency (Sassa) nabePosi mayelana nokuqolwa kwabantu imali yempesheni.
Kulesi sivumelwano kuhlelwa nendlela yokukhokhela abaqolwe noma ngabe ingayiphi indlela eyenza ukuthi bangayitholi impesheni.
Okhulumela abakwaSassa KwaZuluNatal, uMnuz Mbizeni Mdlalose, uthe isivumelwano esibizwa ngeService Level Agreement sibheka ukuthi zombili lezi zinhlaka zizomisa kanjani ukulwa nalesi sihlava.
UMdlalose uthe kuvunyelwane ngokuthi noma ngubani onenkinga yokungayitholi impesheni kumele aqale emahhovisi akwaSassa.
“Onesikhalo kumele alethe umazisi, inombolo yokuvulwa kwecala emaphoyiseni nencwadi efungelwe. Siyakukhuthaza ukuthi avulwe amacala ngoba ukuqolwa impesheni yicala lokukhwabanisa. Uma sesiwatholile wonke amaphepha kwaSassa, imininingwane sizoyidlulisela kwabePosi bese kuqalwa uphenyo olungathatha izinsuku ezisuka kweziyisikhombisa kuya kwezingu-21,” kuchaza uMdlalose.
Uthe uphenyo luzobheka ukuthi ngabe iphutha likubona kwaSassa noma kwabePosi. UMdlalose uthe abaqolwe sebehola ngamakhadi amasha akwaSassa kuyomele bavulelwe ama-akhawunti amasha ebhange babuyele kwaSassa ukuze bafakwe kabusha kwikhompyutha. Ugcizelele ukuthi kuzokhokhelwa okuzobe sekuqinisekisiwe ukuthi ukuqolwa kwabo akubanga ubudedengu babo.
“Siyanxusa ukuthi abantu bawafihle amakhadi abo omholo nenombolo eyimfihlo,” kusho uMdlalose.
Isolezwe selibhale ngezigameko eziningi zokuqolwa kwabantu imali yempesheni ikakhulukazi eyesondlo sezingane.
Osanda kuqolwa nguNkk Busisiwe Xulu waseMgungundlovu okukhishwe uR5 500 ekhadini lakhe lakwaSassa ngoFebhuwari 1. Uthe uhola le mali njalo ngenyanga njengoba ehola isondlo sezingane ezimbili. Uthe eqala ukuyokhipha imali ayiphumanga kwathi uma ebuyela wathola ukuthi sekusele uR400.
“Ngithole ukuthi ikhadi lami lavalwa kwenziwa elinye ngoJanuwari 12. Ngibikile kwaSassa bathi bazophenya. Manje ngithenjiswe ivawusha kaR1 500 ukuze ngiphile nezingane kule nyanga,” kuchaza uNkk Xulu.
Ngenyanga edlule kwaboshwa owesilisa obebamba itoho ePosini eThekwini osolwa ngokukhwabanisa imali yempesheni. Kuphinde kwaboshwa uNkk Lulu Langa waseGreytown osolwa ngokuqola imali yempesheni enguR11 000 okuthiwa ubesebenzisana nabathize kuvulwe amakhadi amasha.