Kugwemeke inhlekelele isiguli sishisa iwodi
ZISINDE ngokulambisa iziguli nabasebenzi basesibhedlela saKwaMaphumulo emuva kokuthi isiguli esiphazamiseke emqondweni sishisa igumbi ebesilaliswe kulo. Umthombo waleli phephandaba ongathandanga ukudalulwa, uthe lesi siguli besivalelwe egunjini laso sodwa ngesikhathi sishisa ngoLwesibili ntambama.
“Akwaziwa ukuthi singene kanjani saze savalelwa sinomentshisi. Sishise isipontshi ebesilaliswe kusona kwase kuthungeleka nakwezinye izindawo esibhedlela,” kusho umthombo.
Uthe igumbi ebesivalelwe kulo belisophikweni okulashelwa kulo abantu abanesifo sofuba.
Ngokwesitatimende soMnyango wezeMpilo, kusize unogada wenkampani osebenzela isibhedlela okunguye okwaze ukutakula lesi siguli, abasebenzi bezempilo nezinye iziguli ezihogele intuthu ngesikhathi kusha. UMnuz Nkanyiso Xaba (30) ongunogada kulesi sibhedlela, ukhiphe iziguli ewodinini elishayo ngaphambi kokuthi aquleke ngenxa yokuhogela kakhulu intuthu.
Uphihlize iwindi wangena ngalo, wahlenga umhlengikazi nesiguli abebevaleleke ewodini ebeligcwele intuthu.
Ekhuluma esesibhedlela lapho elulamela khona, uXaba uthe ubone umlilo uqubuka ewodini obekulele kulo isiguli esiphazamisekile uya ewodini yabalashelwa ufuba.
“Okufike kuqala emqondweni wami ukuthi kunezinye iziguli ezilaliswe esibhedlela ezingakwazi ukuzihambela ngakho bekumele ngizikhiphe. Ngitshele abakwazi ukuzihambela ukuthi abaphumele ngaphandle ngoba kuyasha ewodini,” kusho uXaba. Uthe akazi ukuthi ugcine ekhiphe iziguli ezingaki ngoba konke kwenzeke ngokushesha.
UXaba ophupho lakhe ngukuba yiphoyisa, uthe bebesiseshile isiguli okukholakala ukuthi yisona esiqale umlilo ngaphambi kokuthi basivalele sodwa.
UNgqongqoshe wezeMpilo KwaZulu-Natal, uDkt Sibongiseni Dhlomo, ubuncomile ubuqhawe nesibindi sikaXaba nabanye abasebenzi abebesizana naye.
“Okwenziwe yileli bhungu akukholakali – ukubeka impilo yakhe engcupheni ukuze asindise impilo yabantu. Usisize sagwema inhlekelele,” kusho uDhlomo.