Kusekuncane esikubonayo ngabokufika
MHLELI: Ngithi angiphawule ngodaba olusematheni kulezi zinsuku lukaBhushiri.
Empeleni kusekuncane lokhu, kuyeza kuyanyelela ngoba iqembu elibusayo lisithengise lasiqeda kwabokufika. Bazenzela umathanda kuleli. Ngokuzwa ngosizwile, bathi uBhushiri waxoshwa kwelakubo samthatha thina samfukamela, kunjani-ke nje namhlanje?
Kule lizwe lakithi wonke umuntu osuka ezweni lakhe uyazingenela nje ngaphandle kwenkinga futhi ngiyasho namanje uma kungaqhamuka iqembu lepolitiki elingathi bonke abokufika bazobuyela emakubo bese kuba nomthetho olawula ukungena nokuphuma kuleli uyongibuza ungiphale ulimi, lelo qembu liyowina ngamalengiso okhethweni ngoba abantu bokufika basihlalise lubhojozi.
Banamabhizinisi, banamathuba angcono kunathi ngokomsebenzi ngoba basebenzela uR300 ngesonto ekubeni abafowethu behleli emakhaya.
KoChina Mall kugcwele abokufika kuphela futhi uma ngingaphosisi bangaphezulu kwabaseNingizimu Afrika abokufika abasebenzayo.
Uma uphika lokho hambela izindawo engizibalile. Kodwake, angisho ukuthi abashaywe babulawe, kuphela nje ake lubhekisiswe ngokushesha udaba lwabo bangaze basiqede ngobugebengu babo.
Abanye abanawo amapasi bazenzela umathanda emadolobheni aseGoli. Bayazi ukuthi noma bekudubula amaphoyisa azophenya aze ayeke bangabatholi.
Amanga ukuthi babhacile ngoba kuliwa emazweni abo. Bayagoduka ngamaholidi baphinde babuye, abanye beze ngobugebengu kuleli. I-ANC isihlulekile ukubuyisa isithunzi saleli lizwe. Uma ngingaphosisi yizwe lethu lodwa elingenamthetho emazweni aseAfrika. Thanda Chonco EMPANGENI