Uvela namuhla odle izicubu zikaninakhulu
KULINDELEKE ukuba avele namhlanje enkantolo yaseMgungunldovu owesilisa osolwa ngokubulala ugogo wakhe maqede wadla izicubu zakhe KwaDambuza eMgungundlovu.
Umsolwa (40) kuthiwa kwakumele avele ngoLwesihlanu ngezinsolo zokubulala ugogo wakhe uNkk Judith Ndlela (90), kodwa kwangenzeka ngoba ubesesibhedlela egadwe amaphoyisa.
Umsolwa kuthiwa washaywa umphakathi ngaphambi kokuba aboshwe, walimala njengoba amaphoyisa amthatha endaweni yesigameko amfaka esibhedlela, egadwe amaphoyisa.
Okhulumela amaphoyisa, uColonel Thembeka Mbele, uthe ngenxa yokuthi ubengeke akwazi ukuvela enkantolo ngoLwesihlanu umsolwa, icala libe selihlehliselwa olunye usuku. Uthe idokodo lisagcinwe enkantolo.
Indodakazi kamufi, uNksz Busi Ndlela, ithe bathole umbiko othi icala lizongena ngoMsombuluko.
Umndeni wakaNdlela uthe abanye bazoya enkantolo.
UNksz Ndlela uthe bamatasa nokulungiselela umngcwabo kanina ozoba ngoMgqibelo ehholo KwaCaluza.
Uthe okwamanje, abagxilile ecaleni eliqhubeka enkantolo.
Umsolwa waboshwa ngoLwesine okwenzeka ngawo isigameko.
UNksz Thandeka Ndlela, okhulume neSolezwe ngeledlule emuva kwalesi sigameko, uthe wayelele nogogo wakhe ngesikhathi umsolwa engqongqoza ngendluzula lapho abebelele khona.
Uthe wagcina ekwazile ukungena, elokhu eshisa impepho, ekhuluma into engazwakali.
Uthe esenza ukudla kwasekuseni, wezwa ugogo wakhe esekhala, ebhokodwa umsolwa ngommese. Uthe waphuma eyocela usizo komakhelwane, wabuya umsolwa esebeke usawoti eduze kukamufi, kuthiwa wayesika izicubu zakhe ezidla ziluhlaza. Le ndaba ibisematheni njengoba uNgqongqoshe wezokuThutha, uMnuz Blade Nzimande, kuthiwa naye uvakashele lo mndeni.