Masethembe sizobuya isithunzi sezinhlaka zomthetho
ENYE yezinto ezonakele eNingizimu Afrika neyenza izakhamuzi zingavuni zonke izithelo zikahulumeni wentando yeningi, ukubulawa kwezinhlaka zomthetho eseziphendulwe isikhali sokulwa izimpi zepolitiki. Kule minyaka edlule, abaholi bezinhlaka ezifana noPhiko lwamaPhoyisa, ezokuShushiswa koMphakathi nolwabaQoqi beNtela bebefana nezichuse ebezidansela isiginci sabaholi bepolitiki kunokwenza ubulungiswa njengokusho kwemisebenzi abaphathiswe yona.
Yingakho sincomeka isimemezelo sikaMengameli Cyril Ramaphosa sokuthi kuzoqiniswa uPhiko lokuShushiswa koMphakathi, i-NPA, ngokuthi kusungulwe olwabaphenyi ngaphakathi kulo.
Enkulumweni ebhekiswe esizweni ngeledlule, uRamaphosa umemezele ukuthi sebexoxile bavumelana noMqondisi wokuShushiswa koMphakathi omusha, u-Adv Shamila Batohi, ukuthi kube nophiko lwabaphenyi kwiNPA oluzobheka kakhulu amacala athinta inkohlakalo.
URamaphosa uthe ezinye zezinto ezizokwenziwa yilolu phiko lwabaphenyi, ukubheka ubufakazi obethulwa kumakhomishini afana nalena eqhubekayo njengamanje ebheka ukuLawulwa koMbuso yiDlanzana neholwa nguJaji Raymond Zondo, kucutshungulwe ukuthi bungasetshenziswa yini ukushushisa abantu. UMengameli uthe lolu phiko luzobheka ubufakazi nakwamanye amakhomishini kanjalo nokudla izimpahla zalabo okukholakala ukuthi basuke bezithole ngenkohlakalo.
Kuzokhumbuleka ukuthi phambilini lwalukhona uphiko oluphenyayo ngaphakathi kwi-NPA, ama-Scorpions, olwavalwa ngo-2009. Kwasungulwa ama-Hawks ayingxenye yeSAPS kodwa ukusebenza kwama-Hawks kungezinye zezinto ezikhalisayo njengoba nawo ukusebenza kwawo kunogcobho futhi kulawulwa kakhulu ngosopolitiki. Isimemezelo sikaRamaphosa sizosiza nokuphendula isikhalo seminyaka ngenqwaba yamakhomishini ahlale ebanjwa, kugeqwe amagula kuwo kodwa kugcine kungabi bikho zinyathelo zomthetho ezithathwayo.
Njengoba kukhona abathi inkululeko engahambisani nokuthuthuka kwezomnotho ayisho lutho, kanjalo nohulumeni wentando yabantu ongahambisani nezinhlaka zomthetho eziqinile ezinesithunzi, awusho lutho.