Bafuna ubulungiswa ngelungu elibulewe
BAFUNA ubulungiswa abomndeni kaMlungisi Madonsela ngokushona kwakhe kulandela ukudutshulwa onogada ababezama ukuhlakaza isixuku sabafundi enyuvesi iDurban University of Technology (DUT), ngesonto eledlule.
Ekhuluma enkonzweni yesikhumbuzo ebisehholo laseRitson Campus izolo, umalume kaMlungisi, uMnuz Xolani Ncanana unxuse amaphoyisa ukuthi enze ubulungiswa ukuze kujeze ababulali bakaMlungisi.
“Sinesicelo esisodwa kwabomthetho. Sicela benze umsebenzi wabo ukuze sizothola ubulungiswa,” kusho uNcanana.
Uphinde waphonsela inyuvesi inselelo yokuthi benze ubulungiswa ukuze kungaphinde kube khona isimo esifana nalesi nangokuzayo.
“UMlungisi kumele kube isitshudeni sokugcina ukushonela kule nyuvesi. Inyuvesi kumele iqikelele ukuthi ayenzeki into efana nalena ngokuzayo.”
UNcanana uthe umndeni uhlukumezeke kakhulu ngalesi sigameko futhi okunye okudala ubuhlungu ukuthi umndeni uthola izincazelo eziningi ezihlukene mayelana nokwenzeka ngesikhathi kushona uMlungisi. “Sizitshelile ukuthi sizoqina njengomndeni senzele uMlungisi ngoba uma singaqini kuningi okungeke kuhambe kahle,” kusho uNcanana.
Le nkonzo ibihanjelwe ngisho nawuholi be-EFF kulesi fundazwe okubalwa kubo uMnuz Vusi Khoza noMnuz Komisa Dlamini.
UMengameli womkhandlu wezitshudeni eDUT i-EFFSC, uSesiyanda Godlimpi, uthe umzabalazo uyaqhubeka. Uthe baphoxekile ngendlela lolu daba olusingethwe ngayo njengoba kungekho oseboshiwe kuze kube yimanje.
Umndeni nabangani bamchaze njengomuntu onesihe uMlungisi.
“UMlungisi ubenendaba nabanye abantu futhi enesihe, noma ngilambile wayekwazi ukuthi angiphe ukudla,” kusho uZinhle Majozi, obewumngani wakhe.
Kuvele ukuthi udokotela ukhiphe izinhlamvu ezintathu esidunjini sikaMlungisi ezizohlolwa ukuze kutholwe ukuthi yisiphi isibhamu esamdubula.
Umndeni umemezele ukuthi uMlungisi uzofihlwa kusasa, eJozini, emathuneni asekhaya. Inkonzo yomgcwabo izoqala ngehora lesishiyagalolunye ekuseni.