Kukhinyabeza amabhizinisi ukucishwa kukagesi
BAZWAKALISE ukudumala abahlali baseThekwini ngesimemezelo senkampani ephehla ugesi sokucisha ugesi. I-Eskom imemezele ukucisha ugesi kusukela ngeSonto.
Abahlali abasithokozelanga neze lesi simemezelo njengoba bethi ukucishwa kukagesi kuphazamisa izimpilo zabo.
UNksz Sthabile Buthelezi (30) wase Kenville imphethe kabi indaba yokucishwa kukagesi ngoba ungumuntu osebenza ngabantu. “Ngidayisa izimbali enxanxatheleni yezitolo la eThekwini ngakho uma ugesi ungekho abantu abalubhadi ukuzothenga. Nalapha esihlala khona yimijondolo, ugesi uma ukade uhambile ubuya ngamandla ulimaze izinto zasendlini ezisebenza ngogesi. UMnuz Xolani Buthelezi (40) wase Mlaza uthe: “Ayilungile lento yokuthi i-Eskom ilokhu isicishela ugesi ngoba sigcina singazi ukuthi sizopheka ngani futhi namanzi okugeza asuke ebanda. Uhulumeni kumele angenelele kulolu daba ngoba thina asinawo amandla okulungisa le nkinga. Uma i-Eskom idinga imali uhulumeni kumele ayifake ukuze izophela indaba yokucishwa kukagesi.”
UNksz Mbali Vilakazi (33) waseLindelani uthe: “Ukuhamba kukagesi kunzima. Njengomuntu osebenzayo kuba umthwalo ngoba ngifica izingane zingaphekile ekhaya, kumele ngiwulinde ubuye kube yima ngipheka lapho sisuke sesihambile isikhathi. Kungcono umphakathi ufundiswe ukonga ugesi nokusebenzisa izinto ezingadingi ugesi njengegiza esebenza ngelanga. Nabantu kumele bacime izinto ezidla kakhulu ugesi uma bengazisebenzisi ukuze isimo sizoba ngcono.”
UMnuz Joseph Musa (43) waseNtuzuma uthe ugesi ucishwa isikhathi eside kakhulu, kanti usebenza umsebenzi wokushisela izinsimbi ngakho kuyamlimaza ngoba ulahlekelwa imali eningi. “Nokudla esikuthengile kuyonakala efrijini uma ugesi uhambile. Isimo esibucayi lesi ngakho i-Eskom kumele izame ukubuyisela izinto esimeni.”
UNkk Philisiwe Sefatsa (36) eThekwini uthe njengoba enebhizinisi lokudayisa ophaya ukucishwa kukagesi kulilimaza kakhulu ibhizinisi ngoba liseyibhizinisi elincane abakabinayo imali eyanele yokuthenga ama-generator. Uma ugesi ucisha kuphoqeleka ukuthi bavale.
UNksz Mvelo Ngubane (30) waseLindelani uthe akumphathi kahle ukuhamba kukagesi futhi kudala izinkinga eziningi. “Njengoba ngisebenza nje uma ngibuya emsebenzini ugesi ungekho ngivele ngingazi ukuthi sizodlani nezingane zami ngoba kusuke kungaphekiwe. Mina nginomntwana omncane oncela ibhodlela ngakho kuke kufuneke amanzi abilile okwenzela ingane ibhodlela kodwa ugesi uma ungekho lokho kuba yinkinga kakhulu.”