Isiteleka seCosatu sihlanganisa nothisha
KUZOPHAZAMISEKA ukufunda kwezinye izikole namhlanje njengoba abanye othisha bezobe beyingxenye yesiteleka sikazwelonke sabasebenzi.
Izinkulungwane zabasebenzi abangaphansi komfelandawonye wezinyunyana iCosatu bazongenela isiteleka ngenhloso yokuzwakalisa ilaka labo mayelana nokulahleka kwamathuba emisebenzi kuleli.
Esithangamini nabezindaba eThekwini izolo, uNobhala weCosatu KwaZulu-Natal uMnuz Edwin Mkhize ukuqinisekisile ukuthi othisha abaningi bazobe beyingxenye yesiteleka sabo.
“Othisha nabo bangabasebenzi, banezikhalo abanazo okuthi uma kuvela ithuba lokuthi bazizwakalise kumele balisebenzise,” kusho uMkhize.
Uthe othisha njengabantu abawuthandayo umsebenzi wabo bahlale njalo benendlela yokukhava isikhathi esisuke silahlekile ngokuthi bafundise ebusuku nangezimpelasonto.
“Kubalulekile ukuthi othisha babe yingxenye yalesi siteleka ngoba nabo umzabalazo wabo wamaholo amancane abakawunqobi.
“Siyabanxusa abazali ukuthi babacabangele bakhumbule ukuthi nabo bangabasebenzi,” kusho uMkhize.
Uthe balindele ukuthi kume yonke into edolobheni eThekwini.
“ICosatu eKZN inezinyunyana ezingu-17, ngaphansi kwayo, namalungu angu-350 000, iningi lawo elizobe liyingxenye yesiteleka,” kusho uMkhize.
Uthe isiteleka sabo isona esizobe sisikhulu kunazo zonke ezweni njengoba uMengameli wabo uNkk Zingiswa Losi nobuholi obuphezulu babo bezobe beseThekwini. UMkhize usabise ngokuthi bazowuqinisa umkhankaso wabo kuze kuba izimfuno zabo ziyalalelwa.
USihlalo weCosatu KwaZuluNatal uMnuz Skhumbuzo Mdlalose, uthe bayakhala ngemigomo kahulumeni okuhloswe ngayo ukwakha amathuba emisebenzi.
“Esikhundleni sokuba isimo sibe ngcono, siyaqhubeka siba sibi kakhulu njengoba abantu bakithi beqhubeka nokungasebenzi,” kusho uMdlalose.
Uthe kumanje izinga lokungasebenzi kuleli lihleli ku-38%, wengeza ngokuthi bangu10 million abantu abangasebenzi.
“Abantu abangu-17 million ezweni baphila ngezibonelelo, ngesikhathi lapho izisebenzi zikahulumeni nezasezinkampanini ezizimele zibhekene nengwadla yokulahlekelwa imisebenzi,” kusho uMdlalose.
Uthe inyuvesi yaseStellenbosch iveze ukuthi ingu-5.7 million imisebenzi engase ilahleke ngenxa yezobuchwepheshe.
Okhulumela uMnyango wezeMfundo eyisiSekelo kuzwelonke uMnuz Elijah Mhlanga, uthe bakhathazekile ngesiteleka sabasebenzi esizophazamisa ukufunda.
“Sikhathazekile ngoba izikole zingase ziphazamiseke. Sinethemba lokuthi lokhu ngeke kwenzeke ngoba othisha bayazi ukuthi imuphi umthelela walokhu. Sinxusa abazobhikisha ukuthi bangaziphazamisi izikole,” kusoh uMhlanga.
Okhulumela iSadtu uNksz Nomusa Cembi, uthe bazoba yingxenye yalesi siteleka wathi bakhathele ukufundisela emakilasini agcwele kakhulu.
“Sizosebenzisa le mashi ukugqugquzela ukuphepha ezikoleni njengoba uhulumeni kumele ayisukumele le ndaba.
“Isiteleka sisemthethweni futhi sivikelekile ngakho abekho abazoba senkingeni ngenxa yokuba sesitelekeni,” kusho uNksz Cembi.