Bafuna ukushushisa uMoyane ngolweSARS
ICORRUPTION Watch ithe izofuna ukumshushisa owayeyisikhulu sakwaSARS uMnuz Tom Moyane, ngokuthi kumele abhekane nengalo yomthetho.
Lokhu kulandela isinqumo senkantolo yomthethosisekelo esichithe isicelo sikaMoyane sokuzama ukubuyela emsebenzini wakhe.
INkantolo ithe uMoyane ngeke esakwazi ukuphumelela kwenye inkantolo.
Okhulumela uMengameli uNkk Khusela Diko, uthe bayasamukela isinqumo senkantolo.
“Lokhu kuzovala isahluko kulolu daba kuvule nethuba lokuthi kwakhiwe kabusha iSARS nokubuyisa ukwethenjwa kwayo.”
UMengameli Cyril Ramaphosa nyakenye wamukela umbiko wejaji eselathatha umhlalaphansi uRobert Nugent, owayehola ikhomishini eyayiphenya ngezinto ezithinta intela kwaSARS.
Ithimba labammeli bakaMoyane lafaka amaphepha lifuna kuguqulwe isinqumo senkantolo iNorth Gauteng High sangoDisemba 11, esamchitha sathi kumele kuqokwe ukhomishana kwaSARS.
Isikhulu esiphezulu seCorruption Watch, uJaji David Lewis, uthe bajabule ngalesi sinqumo.
Uthe uRamaphosa noNgqongqoshe weziMali sebeqalile ukufuna uKhomishana omusha kwaSARS.
Ummeli kaMoyane uMnuz Eric Mabuza, uthe basamukele isinqumo senkantolo.
Uthe bazogxila ekufakeni imibuzo uNgqongqoshe wezamaBhizinisi kaHulumeni uMnuz Pravin Gordhan kwikhomishini ephenya ngokulawulwa kombuso yidlanzana.
Uthe ufuna ukumfaka imibuzo njengoba kulindeleke ukuthi kube ngoMashi 13.