I-IEC nohlelo lokusiza abakhubazekile ngokuvota
ISIKHULU sezokhetho KwaZuluNatal uMnuz Mawethu Mosery, sithe kuningi okwenziwa yikhomishini i-Independent Electoral Comimission (IEC) ukufinyelela kubantu abaphila nokukhubazeka.
UMosery uthe noma kuhlale kuyinselelo ukufinyelela kubona kodwa bayazama ngoba alukho uhlu oluqondile lokuthi bahlalaphi namakheli abo.
“Inkinga alukho uhlu lokuthi bakuphi nendawo ukuze sikwazi ukufinyelela kubona uma sifuna ukubabhalisela ukuvota noma ukubafundisa ngokuvota. Esikwenzile kulo nyaka ngukuthi siqashe umuntu ongaboni eJozini, okunguye okwazi ukusikhombisa lapho kukhona abanye abaphila nokukhubazeka ukuze sikwazi ukufinyelela kubona,” kusho uMosery.
Usho lokhu izolo ngesikhathi kunomhlangano nezinhlangano zabaphila nokukhubazeka eThekwini njengoba kuzovotwa ngoMeyi 8. Uthe basuke befuna ukufinyelela kubo ukuze bavote ngokwesipesheli. Uqhube wathi basebenzisana nomasipala nophiko lwabantu abaphila nokukhubazeka.
“Siyabacela ukuthi emasontweni ambalwa ukuthi basho uma befuna sizobafundisa ngokuthi sibabhalisele ukuvota. Uma sekufakwe ngaphansi komqulu usuku lokhetho bangafaka izicelo zokuthi bavote ngokuyisipesheli,” kusho uMosery.
Uthe baqeqeshe abantu eziteshini zokuvotisa ukuze bakwazi ukubona labo abaphila nokukhubazeka bakwazi ukubasiza.
UMnuz Jace Nair, isikhulu esiphezulu seBlind SA, uthe abantu abaningi abangaboni besebelilahlile ithemba bengasafuni ukuvota ngoba bebenganakiwe uma sekumele bavote.