Obekuhlupha uMentor kwikhomishini
OWAYEYILUNGU lePhalamende, uNkk Vytjie Mentor, izolo ubuze kabanzi ngokwethembeka kwemininingwane yocingo eqoshiwe eyiswe kwiKhomishini ivela kuNkk Lakela Kaunda owayesebenza njengomsizi kaMnuz Jacob Zuma.
UNkk Mentor ubethula ubufakazi osukwini lwesibili kwikhomishini lapho ekade ehlohlwa imibuzo. Ngonyaka odlule wabethula ubufakazi kodwa nakulo nyaka uphinde wabizwa ngoba bekukhona izinto obekumele azicacise.
Ngonyaka odlule watshela ikhomishini ukuthi uNkk Kaunda wamshayela ucingo wamtshela ukuthi kumele ahlangane noZuma eGoli ukuze bakhulume ngezinto zikahulumeni.
UNkk Mentor ngaleso sikhathi wayenguSihlalo wekomiti elibhekele ukusebenza kwamabhizinisi kahulumeni.
Uthe ukufika kwakhe eGoli kwaholela ekutheni agcine eseya emzini wakwaGupta lapho athenjiswa khona umsebenzi wokuba nguNgqongqoshe wamaBhizinisi kaHulumeni.
UNkk Kaunda uphikile ukuthi washayela uNkk Mentor wakhipha nemininingwane eqoshiwe yocingo eqinisekisa ukuthi akaze amthinte.
Ummeli kaNkk Kaunda, u-Adv Henry Cowley, utshele ikhomishini ukuthi akukaze kube khona ukuxhumana phakathi kwamumele noNkk Mentor.
UNkk Mentor, izolo ophike nemininingwane yoMnyango wezaseKhaya neyakwa-SAA, nayizolo ubemile ekutheni waxhumana noNkk Kaunda wathi abagcinanga ngokuxhumana kodwa babethumelelana nemiyalezo.
“Ngeke ngikhulume ngokwethembeka kwemininingwane ekhishwe nguNkk Kaunda kwiKhomishini, ivela kuyena hhayi kwaVodacom. Ngatshelwa ukuthi izinkampani zamaselula aziyigcini imininingwane ngaphezu kweminyaka emihlanu,” kusho uNkk Mentor.