ICosatu ikhathazekile ngabantu abangasebenzi

ICOSATU ayeneme ngokwehla kancane kwesibalo sabantu abangasebenzi eNingizimu Afrika.

Okhulumela iCosatu, uMnuz Sizwe Pamla, uthe izibalo zabantu abangasebenzi zitshengisa ukuthi alukho uhlelo lokuxazulula inkinga yokungasebenzi kuleli.

UPamla uthe ngisho ekoteni yokugcina yonyaka odlule bebezitshela ukuthi kuzoqashwa abantu abayitoho ngesikhathi samaholidi kodwa lokhu akuzange kwenzeke. “Lezi zibalo azifaki izicelo zokudiliza abasebenzi ezihlale zifakwa kwi-CCMA kuyona yonke imikhakha. Isibalo sabaqashiwe sinyukile safinyelela ku-16.5 million.”

UPamla uthe yingakho benxusa abasebenzi ukuthi babe yingxenye yombhikisho wanamhlanje wokutelekela ukudilizwa kwabasebenzi.

Uthe bahlale bethenjiswa imigomo yokwakha imisebenezi kodwa igcine ingafezekanga uma sekudlule ukhetho.

Usho lokhu nje umbiko okhishwe yiStats SA izolo uveze ukuthi izinga lokungasebenzi lehlile laya ku-27.1% ekoteni yokugcina yango-2018 lisuka ku-27.5%.

Umbiko iQuarterly Labour Force Survey uveza ukuthi sinyukile isibalo sabantu abaqashiwe ngo-149 000 saya ku-16.5 million ekoteni yokugcina yonyaka odlule.

Umbiko uveze ukuthi sehlile isibalo sabangasebenzi ngo-70 000 saya ku-6.1 million uma uqhathanisa nekota yesithathu.

“Izinga linyuke emikhakheni emine, umkhakha ozimele unyuke ngemisebenzi engu-65 000, eyezolimo ngo-7 000 kwathi eminye imikhakha yanyuka ngo-15 000 wemisebenzi. Emkhakheni wezokukhiqiza inyuke ngo-48 000 imisebenzi,” kusho umbiko.