Amaqhawe ethu awabungazwe yithina kuqala
UFEBHUWARI 10, 2019 wolunye lwezinsuku ezibalulekile emlandweni womculo eNingizimu Afrika ngenxa yokuthi iSoweto Gospel Choir (SGC) ihlabane okwesithathu ngendondo kumaGrammy Awards eStaples Center, eLos Angeles, e-USA.
I-SGC, eyasungulwa ngumbhidi wakhona eSoweto, uDavid Mulovhedzi ebambisene nozakwabo uBeverly Bryer ngo-2002, idle umhlanganiso emunxeni weBest World Music Album ngecwecwe layo elithi Freedom.
Beyiqhudelana nezingwazi zakwamanye amazwe ase-Afrika, okuwu-Omara ‘Bambino’ Moctar, Seun Kuti baseNigeria, Fatoumata Diawara waseMali no-80 wase-Egypt.
Ukuphumelela kwayo akujabulisanga amalungu ayo nabasondelene nawo kuphela kodwa izwe lonke jikelele. Yingakho noMengameli Cyril Ramaphosa, noNgqongqoshe wezobuCiko namaSiko, uMnuz Nathi Mthethwa, beyihalalisele.
I-SGC, enomlando omuhle, ibisiqokwa okwesihlanu. Yaba yiqembu lokuqala lomculo lalapha ukucula emcimbini wama-81st Oscar Awards. Ingoma elalipikwe kuyo nguPeter Gabriel noThomas Newman ethi Down To Earth yaqokwa kumaGolden Globe Awards nakuma-Oscar Awards emunxeni weBest Original Song.
Ike yacula ngokuhlanganyela noBeyonce engomeni ethi Halo kwiGlobal Citizen Festival.
Ngaphandle kokuqhakambisa iNingizimu Afrika emhlabeni jikelele, inzuzo i-SGC eyenza emakhonsathini ibuye ifukule ngayo umphakathi.
Seyiqongelele imali engaphezu kukaR3 million ukuze kusekwe ikhaya lezintandane iNkosi’s Haven eyaqanjwa ngesishoshovu semikhankaso yegciwane lengculazi, uNkosi Johnson, esadlula emhlabeni ngo-2001 sineminyaka ewu-12.
Yize isihlonishwa umhlaba wonke futhi ibambe iqhaza ekufukuleni umphakathi kodwa okubuhlungu wukuthi kubukeka inganakiwe.
UMulovhedzi uze washona ngo-2009 engakaze ahlonishwe ngeqhaza lokuqoqa intsha yaseSoweto, eyayingagcina ingondingasithebeni, wayenza abantu amaqhawe.
Isike yahlonishwa nangezindondo eziphezulu kuma-Australia Helpmann Awards nakumaAmerican Gospel Music Awards ngo-2003. Sekuyisikhathi sokuthi amaqhawe ethu abungazwe ekhaya ngaphambi kokubungazwa ngaphandle.