I-EFF izoxosha abathola izinombolo ezincane

AHLELI ngesinqe esisodwa amakhansela angu-30 e-EFF, KwaZulu-Natal ngemuva kokuba ubuholi besifundazwe buqale uhlelo lokuba axoshwe.

Amakhansela azoxoshwa yilawo okuthiwa awasebenzanga kahle ngokhetho, athola amavoti angaphansi kwangu-100.

Umholi we-EFF KwaZulu-Natal, uMnuz Vusi Khoza, uthe kufanele engabe kade kwenziwa lokhu kodwa inkinga ukuthi iKZN ibingenabo ubuholi besifundazwe.

“Ngokukazwelonke kufanele engabe kade kwaphothulwa ukususwa kwamakhansela ethu athola izinombolo ezincane komasipala. Inkinga kube ukuthi ubuholi besifundazwe bahlakazwa, kwagcina kumile ukuba kube nezinqumo ezithathwayo okuhlanganisa naso lesi sokuxosha amakhansela,” kusho uKhoza. Ngo-2017, isigungu esiphezulu se-EFF sabhalela wonke amakhansela aso ezifundazweni ayethole izinombolo ezincane. Lezi zincwadi zaziwazisa ukuthi azoxoshwa bese kufakwa labo ababethole amavoti amaningi kodwa abebesemuva ohlwini lokuba amakhansela.

Elinye lamakhansela lithukile ukuzwa ukuthi le ndaba isaqhubeka.

“Hhawu! madoda ubani manje osevusa le ndaba ngoba besesithi isiyekiwe. Sizolimala ngoba kuyacaca ukuthi unyaka uzophela umuntu engasenawo umsebenzi,” kusho leli khansela elicele kugodlwe igama lalo.

UKhoza uthe akusajiki kodwa bahlabela phambili nalesi sinqumo.

“Asisajiki, siphezu kwalo uhlelo lokuxosha labo abathola izibalo ezincane, uma kukhona othi lolu hlelo lwayekwa ukhuluma iphutha,” kusho uKhoza.

Amakhansela athintekayo awaseJozini, eZululand, eThekwini naseNquthu kodwa elakhona alizange lisabuya ngemuva kokhetho lokuchibiyela obelungonyaka odlule.

Ngo-2016 kwasuka umsindo kwi-EFF kunamalungu ayekhala ngokuthi kukhona ababethole izinombolo ezincane kodwa bangena ebukhanseleni.

Lo msindo waholela ekutheni abanye bayishiye i-EFF.