Udilikajele kowaphanga wabulala isitshudeni
UGWETSHWE udilikajele waphinde wagixabezwa ngeminyaka engu-15 ngaphezulu ngokuphanga umlisa owabulala isitshudeni sase-University of Zululand esangenelwa abantu endlini basidubula sashona.
INkantolo eNkulu yaseMgungundlovu igwebe uKhanyisani Khumalo (25) udilikajele ngokubulawa kukaMnuz Frank Chirwa (27) owayenza izifundo zeBCom Banking, Ongoye owabulawa ngoOkthoba 2016.
UKhumalo uphinde wagwetshwa iminyaka engu15 ngokuphanga kuhlonyiwe njengoba kulesi sigameko kwaphinde kwathathwa iselula kamufi.
Uyise kaFrank, uMnuz Blessing Chirwa utuse umsebenzi wamaphoyisa nobulungiswa obenziwe yinkantolo ngokugweba uKhumalo.
UChirwa owakhipha umehlokaboni kaR100 000 enxenxa amalungu omphakathi ukuthi eze ngaphambili nolwazi olwaluzoholela ekuboshweni kwababesolwa ngokubulawa kwendodana yakhe, uthe ujabule kakhulu noma azi ukuthi ngeke isabuya indodana yakhe.
Uphinde wancoma nomsebenzi owenziwe amalungu omphakathi ngokuthi eze ngaphambili asize kubanjwe abasolwa.
Uthe isinqumo senkantolo sibathobe amanxeba njengoba ethe balahlekelwa ngokubulawa kwendodana yakhe.
Ukhale ngokuthi indodana yakhe beyiwusizo ekhaya ngoba ibimsiza nasemabhizinisini futhi iwusizo nakwezinye izitshudeni enyuvesi. “Isinqumo senkantolo sisinike ithemba kakhulu njengomndeni ngoba ukubulawa kukaFrank kwasihlukumeza kakhulu.
“Unina ubengena ephuma ezibhedlela kanti nomfowabo akabnge esaqhubeka nezifundo zakhe zobumeli ngoba ehlukunyezwe ukubona umfowabo ebulawa kade efunda,” kusho uChirwa.
Unxuse amalungu omphakathi ukuthi aqhubeke nokusebenzisana namaphoyisa ukuze izigilamkhuba ziboshwe bese zithola izigwebo ezinzima.
Uthe ukusebenzisana kwabo bewumndeni, amaphoyisa nomphakathi kube nomphumela omuhle.
Uphinde wabonga nomngani wendodana yakhe ngokuba nesibindi sokufakaza enkantolo.