Inkabi iyacula ngelokusoconga ikhansela
I-IFP noNgqongqoshe wamaPhoyisa kuleli bathi bashaqekile ngokusatshiswa ngokubulawa komndeni wowesilisa ogonyuluke kubo ngokusocongwa kwekhansela leNkatha laseZululand. Lo mlisa usevule necala emaphoyiseni aseMgungundlovu ePressburry, ladluliselwa eVryheid kanti uthi usongelwa umholi oqavile kwi-IFP ngoba efuna asuse igama lakhe esitatimendeni esifungelwe esimnukayo.
Lokhu kulandela ukuthi lo mlisa ocele ligodlwe igama lakhe, ekhale ngokuthi kunamaphoyisa awabize ngamagama asebeke engcupheni umndeni wakhe ehlangene nalo mholi we-IFP naye eligodliwe igama lakhe.
Uthi kumanje kunezingcingo ezisabisa umndeni wakhe.
USihlalo we-IFP kuzwelonke, uMnuz Blessed Gwala, uthe uyashaqeka uma esethola ukuthi lo mlisa owathi wayekhona kubulawa ikhansela uSbuyiselo Dlamini, usesatshiswa ngaphakathi eqenjini.
“Lowo muntu ngiyamazi. Wasifonela samhlelela ukuba afike eThekwini wabe esesichazela ngakwaziyo. Ngavele ngabona ukuthi lesi sinindolo asichazayo singaphezu kwami, ngamthatha ngamdlulisela kwiziphathimandla zamaphoyisa. Ngakho unamanga uma esethi ngamhambisa kuBheki Cele, asikaze nje sihlangane noCele. Ngaphandle kwalokho okunye okwenzekayo lapho angikwazi ngakho ngiyethuka uma sekuvele ukuthi kunomunye umholi wethu osabisa lo mlisa ukuze aguquke kwayekushilo phambilini. Mina ngamyisa emaphoyiseni ngoba ngangibuye ngididwe ukuthi lo muntu unamalimi,” kusho uGwala.
Okhulumela uCele, uNksz Reneilwe Serero ukuqinisekisile ukuthi bahlangana nalo mlisa kodwa bayethuka uma sebezwa ukuthi uyasatshiswa ngoba ubengakwazi lokho.
Lo mlisa usejele laseMgungundlovu, iNew Prison ngecala lokubulawa kowayeyimenenja kaMasipala waseRichmond, uMnuz Sibusiso Sithole.
“Kuthe ngesikhathi ngiyiswe enkantolo yaseVryheid, eLouwsburg ngecala elingahlangene nalolu daba naleli engiliboshelwe, sahlangana endleleni nalo mholi weNkatha. Amaphoyisa ayengihambisile ayelokhu ekhuluma naye ocingweni. Wayeshayelelwa iBMW X5 emhlophe. Sayilandela sangena emgwaqweni owubhuqu nalapho esafike sama khona. Kwaphuma ubhuti owayehamba nabesilisa ababili abamsiza ukuba ehle emotweni. Ngakhumbula ukuthi ngiyamazi nguye lona owasikhokhela imali engu-R450 000 oLundi mhla siqeda ukubulala uDlamini wakhuluma nami wathi ukhathazekile ngokuthi ngigonyuluke ngegama lakhe kwi-IFP ngakho ucela ngiguqule lokho ngithi ngangithengwe yiyo (IFP) ukuba ngimqambele amanga,” kusho lo mlisa.
Uthe okumphethe kabi ukuthi lawa maphoyisa ayakwazi ukumcela ejele uma ezoya enkantolo ahambe naye ngakho useyasaba ukuthi azomenzakalisa.
Uveze nokuthi nezinkabi ayenazo ziyazi kubo futhi azikaboshwa.
Uqhube wathi kumanje amaphoyisa nalo mholi we-IFP, bafuna aqinisekise ngokuboshwa kwabasolwa basoLundi ukuthi uyabazi ekubeni engakaze ahlangane nabo.
Uveze ukuthi mhla beyobulala uDlamini wayehamba nezinkabi zaseEastern Cape ngeGolf kanti kukhona owayebasiza ebatshela ukuthi umufi usekuphi.
“Satshelwa ukuthi umqaphi wakhe akekho kushoniwe kubo ngakho uhamba yedwa. Okokugcina satshelwa ukuthi asigade emarobhothini asuka edolobheni oLundi ngoba uzoqhamuka ngakhona uphuma eShisanyama nokuyindlela esamthola ngayo samdubula,” kusho lo mlisa.
Uthi kumanje ayenabo abakaboshwa ngakho nabo sebeqalile basabisa ngokuthi bazoqotha umndeni wakhe oseMdantsane ngoba bayazi ukuthi uhlalaphi.
UMnuz Skhanyisele Dlamini ongumfowabo kamufi uvele waphelelwa amazwi ezwa le ndaba.
Uthe kusho ukuthi lawa maphoyisa abalokhu bewathemba abewabiza ngamagama, yiwo kanti ayingozi, wathi abasazi bewumndeni bazothemba bani manje ngoba ne-IFP abasayithembi.
Okhulumela amaphoyisa KwaZuluNatal UColonel Thembeka Mbele, ukuqinisekisile ukuthi kukhona icala lokusabisa eliphenywayo.