Uvinjwe ubizo ukuba ngumdlali ezingeni lomhlaba
IBHUNGU laseMlaza elaba nenhlanhla yokuba semabhukwini ezinkulisa zeParis Saint Germain yaseFrance eminyakeni eyisithupha edlule, uMpumelelo “Benni” Makhaye, liphumele obala lanaba ngokuphikiswa kwalo ubizo lobungoma ekubeni umdlali webhola odume umhlaba wonke.
Okusukumise uMakhaye (26) phansi wavulela Isolezwe isifuba ngokushabalala kwamaphupho akhe kunobhutshuzwayo, yisigameko esishiye iningi liphoxekile senjini yeKaizer Chiefs uWiseman Meyiwa.
Kunamasonto amabili udaba lukaMeyiwa (19) lushaqise izwe lonke ephoqeleka ukuthatha umhlalaphansi ngenxa yokulimala umgogodla engozini yemoto nokushiye imilenze yakhe ingasebenzi.
Leli bhungu lithi uma sekufanele kusayinwe yonke into naleli qembu laseFrance lavele lezwa esingezansi salo sengathi asisebenzi, iqale lapho-ke indaba.
UMakhaye uthi akekho udokotela angahanjiswanga kuyena khona eFrance, Germany nase-England kodwa kwagcina kuphoqa ukuthi akabuyele ekhaya. Kulapho bebone khona kungcono bazame ngezindlela zesintu.
“Kulapho kuvele khona indaba yami yobizo futhi nginele ngayiqala yaphela yonke indaba yokungasizwa isingezansi sami njengoba ngizihambela ngezinyawo zami namuhla,” usho kanje uMakhaye.
UMakhaye uthi noma engasho ukuthi noMeyiwa ukhonkobaliswe wubizo kodwa isimo sakhe simenze wabona ukuthi sekufike isikhathi sokuthi avule isifuba atshele izwe ngobizo lwedlozi nokuphunyukwa yithuba lokufeza iphupho lakhe lokuba umdlali weBafana Bafana.
“Kuyimanje ngisezinhlelweni zokwenza iqophamlando elizoxoxa ngobizo lilandela impilo yami.
“Kusukela ekudlaleni ngiyisilomo kuze kufika ekutheni impilo yami iyama,” kusho uMakhaye.
Okwenza afanise impilo yakhe nekaMeyiwa wukuthi wabuya esethathwe yinkulisa yesikhondlakhondla saseFrance, iParis Saint Germain (PSG), kwayima ezothwasa. Ngaleso sikhathi iPSG yayidlalelwa oDavid Becham, Zlatan Ibrahimovic, Siaka Tienne, Javier Pastore, Maxwell noThiago Silva kanti yayiqeqeshwa uCarlo Ancelotti.
“Ngiyakholelwa ekutheni ubizo lwami lwangiphuthisela ngokuba umdlali ongabe kukhulunywa ngaye namuhla. Yize kunjalo kodwa angikhali ngalutho kukhona konke okwenzeke empilweni yami. Ngisendaweni efanele manje. Ngiyalapha futhi ngijabule empilweni yami. Sekungcono manje ngoba okuningi sengiyakuqonda. Kunezikhathi lapho bengifuna khona ngisho ukuzibulala ngoba ngibona ukuthi impilo yami indaba yayo ayikho. Ngidlale ezinkulisa ezinohlonze obekuyizinkomba zokuthi ngiya kude nebhola kanti angibuzanga elangeni,” usho kanje uMakhaye.
UMakhaye odlale ezinkulisa zeKaizer Chiefs, Orlando Pirates, Bloemfontein Celtic, Ajax Cape Town, AmaZulu nePSG yaseFrance uthi kumthathe isikhathi ukukwamukela lokhu.
“Ukugula kwami njalo. Ukuxabana nozakwethu nezinto ezifana nokuthi ngingakhethwa uma kudlalwa kodwa kuyimina obeqhulula amagoli bekungibulala ngaphakathi kodwa sekuyangicacela manje ukuthi bekudalwa yini.
UMakhaye obuye abizwe ngoNyamsoro noma ngoBenni (okuyigama aphiwa lona eseneminyaka eyisithupha) uveze ukufika kwakhe eFrance ngaphambi kokuthi kwenzeke isimanga.
“Kuthe ngesikhathi AmaZulu sekufanele angikhuphulele esigabeni esikhulu ngavele ngalimala ngimi ngedwa. Abeqeqeshwa uRoger (Palmgren) esizwa uRonnie (Moroka). Bekungenye yezindlela zokutshelwa ngobizo lwami. Akukho okungazanywanga kodwa unyawo lwaphinde lwazipholela lona.
Ngithathwe uSteve (Komphela) noMandla (Ncikazi) besekwiFree State Stars. Nakhona akulunganga ngezizathu engingeke ngikutshele kodwa ngabonwa insizwa yakhona eFrance okuthiwa uJean-Pierre owangibona kwiNike The Chance okwakukhethwa kuyona abantu abazoya kwi-FC Barcelona.
Ngashaya inqwaba yamagoli kodwa ngangathathwa. Ngafika kanjalo eFrance ngaze ngaphiwa ngisho igama elithi Michael Ongende.
“Ngiqoma lokhu (ukushintsha igama) nje, yingoba ngicasulwa ukuthi ithalente lami alibonwa kuleli. Ngidlale noKingsley Coman no-Adrien Rabiot. Sekufanele kukhulunywe izindaba zokusayina, izinyawo zami azangakwazi ukusebenza,” kusho uMakhaye. Kulapho-ke kuqale khona indaba yokuthi akaye koshaya idayisi. Konke kuvele lapho.