Ithemba kuBaxter kululama izethenjwa
UMQEQESHI weBafana Bafana uStuart Baxter, ugcwele ithemba ngokuzibekisela indawo kwiAfrica Cup of Nations (Afcon) ese-Egypt maphakathi nonyaka.
UBaxter kulindeleke ukuthi amemezele maduze nje iqembu lakhe azohlasela ngalo eTunisia lapho eyodlala khona komqoka neLibya.
Kulo mdlalo iBafana imelwe ukugwema ukuthi ishaywe ukuze nakanjani izobalwa namazwe asethubeni lokuba ompetha base-Afrika uma sekuphele lo mqhudelwano obekufanele ube seCameroon. Okwenza uBaxter agcwale ukuzethemba ukuthi kunabadlali bakhe abaningi angakwazanga ukubasebenzisa emidlalweni emibili edlule ngenxa yokulimala.
Iningi lalabo badlali selibuyile enkundleni liyadlala kodwa basekhona abanye abangakalulami ngokugcwele. Kulabo badlali kukhona nensika kanozinti engu-Itumeleng Khune yena iqembu lakhe iKaizer Chiefs eselakucacisa ukuthi ngeke aphinde abonakale enkundleni kule sizini kulandela ukuhlinzwa ihlombe.
Abadlali abafana noKeagan Dolly, Bongani Zungu, Bradley Grobler, Dean Furman noKamohelo Mokotjo bonke abadlalanga ngesikhathi iBafana idudulana neNigeria kuba u 1-1 ngoNovemba nyakenye. NgokukaBaxter iningi lalaba badlali liyathembisa kakhulu ukuthi lizobe likhona eTunisia. Lo mdlalo useTunisia nje yingoba izimpi zombangazwe zidla lubi eLibya osekuyenze yadlalela imidlalo yayo yasekhaya emazweni angomakhelwane okungenani iminyaka ecela kwewu -10.
Ngaphandle kwazo zonke lezi zethenjwa, iBafana iphumelele ukunenebula iSeychelles ngo 6-0 ekhaya yize kubuye kwaba nebohlololo emdlalweni wempindamshaye, eSeychelles lapho libuye khona nephuzu elilodwa.
Ngaphandle kwalo mdlalo weSeychelles, laba badlali athi uBaxter izehenjwa zakhe bebengekho futhi iBafana icazelana ngamaphuzu neNigeria emdlalweni obuseFNB Stadium.
“Kuningi obekuhlukile kule midlalo edlule ngaphandle kokuthi bekulimele izethenjwa eziningi. Isilomo sethu esinguPercy (Tau) asizange sidlale ngendlela esisazi ngayo. Ngiqaphelile nokho ukuthi okunye obekuyinkinga uTau ubematasa eshintsha impilo kwazise ubeseqala impilo yaseEurope. Kwesinye isikhathi akulula lokho. Ukungabibikho kwalaba abanye abebelimele akuzange nakho kusisize. ULebo (Mothiba) ubengadlali kanjalo noBongani (Zungu). Kumnandi kimina ukwazi ukuthi uZungu useqalile ukuziqeqesha ngoba umqoka kakhulu kithina,” kusho uBaxter.
UDolly noZungu bobabili abaseFrance yibona okubanjwe ngabo umoya ngoba oMokotjo, Grobler noFurman bonke sebebuyile ngokugcwele enkundleni futhi benza kahle emaqenjini abawadlalelayo.