UVilakazi neqhinga lokuthuthukisa ibhola kuleli
INKAKHA uBenedict “Tso” Vilakazi, ibona ikhambi lempumelelo yeBafana Bafana nokushaywa kwamagoli kwiPSL ilele ekuqinisekiseni ukuthi kuthuthukiswa abadlali abasemazingeni aphansi.
UVilakazi, owayeyibambe kwiOrlando Pirates, Mamelodi Sundowns nakwiBafana Bafana wayeyingxenye yeqembu le-Bafana eladlala kwi-2006 kwi-African Cup of Nation, e-Egypt.
Ukusho lokhu ngesikhathi exoxa neSolezwe emdlalweni womkhaya i-Orlando Pirates ne-Kaizer Chiefs obuse-FNB Stadium ngoMgqibelo nophele ngokulingana ngo 1-1.
Uthe ubelindele ukuba kube nenqwaba yamagoli kulo mdlalo kodwa kwangenzeka njengezifiso zakhe.
Umdlalo weBafana olandelayo uzoba ngoMashi nonyaka, lapho izobhekana ne-Libya ukuze izibekisele indawo kwi-Afcon.
Ukuntuleka kwabagadli abakhaliphile kufakazelwa wukuthi umdlali obesahamba phambili ngamagoli kwi-PSL kusengu-Mwape Musonda, we-Black Leopards, ngamagoli ayisishiyagalombili kule sizini ekubeni e-Europe abadlali asebeshaye amagoli alinganiselwa kwawu-25.
Le nkakha okumanje ingumphathi wabaqeqeshi e-Starlet Football Academy, ese-Roodepoort.
Abadlali bale nkulisa badlala kwiligi ye-SAB ngaphansi kwe-SAFA eNorth West.
Iminyaka iqala kwaba neminyaka emihlanu, okukhona nendodana yakhe, baze befinyelelee kwewu-19.
“Ngiyakholelwa ekutheni ligotshwa liseva.
Ngabe asinayo le nkinga esibhekene nayo yokuntuleka kwabadlali abasezingeni kwiBafana ukuba sibaqala besebancane.
Ngokunjalo nokwentuleka kwabagadli abangalibheki ipali kwi-PSL, ukuba sibathuthukisa besebancane ukuze sibalungiselele ukudlala leli bhola esilifunayo.
Kumele ngabe umqeqeshi weBafana uphethwe yikhanda lokuthi ngizokhetha bani ngishiye bani, ngenxa yohlobo oluphezulu lwabadlali esinalo.
Engike ngikubone kwenziwa amaqembu aphesheya esizwe ukuthi uma sekukhona umdlali ongalibheki ipali esezothatha umhlalaphani, babe beqala ukulungisa omunye umdlali osemncane ukuba athathe indawo yakhe, ukuze izinga leqembu lingeke lehle uma kuhamba abadlali abadala,” kusho uVilakazi.
Uthe njengomdlali omdala weBafana uzimisele ngokuthi abe nezinkulumo ezakhaya uma ebizwa yiSAFA ukuthi azokwenza lokho.
“Ngesikhathi ngidlala kwiBafana baningi abadlali ababengaphambi kwethu abebesiseka futhi besigqugquzela ukuba senze kahle. Nami ngizimisele ukuba ngisondele kubadlali ngibayale, ngiphinde ngibaseke,” kusho uVilakazi.
Uthe ukusebenzisana kwakhe ne-Shield South Africa, ekukhuliseni ibhola emazingeni aphansi ukwenzela ukusiza ukuthuthukisa ibhola kuleli.
“Uyabona nje umfana wami uneminyaka emihlanu kodwa usedlala kwisigaba sabangaphansi kweminyaka eyisishiyagalombili ngoba sifuna bebe sezingeni lomhlaba, bekwazi ukudlalela amaqembu amakhulu nelesizwe. Ukubanikeza ithuba lokudlala ibhola besebancane kuyabasiza befunde ngebhola lakuleli,” kusho uVilakazi.
Umphathi wezokukhangisa kwaShield Men SA Gareth Marshall uthe ukusebenzisana nabadlali abafana noVilakazi yikhona okusiza ekulekeleleni abadlali abancane abanethalente.
Kumanje banomkhankaso obizwa nge-Shield Sbonis’ iDiski lapho bethungatha abadlali abancane, besebenzisana namaqembu amakhulu.
Kusukela ngo-2017 umdlali odla umhlanganiso kulo mkhankaso uthola ithuba eliyingqayizivela lokuziqeqesha ne-Pirates ngenkontileka yonyaka wonke.