Ukuzethemba kowaMajita
ISILOMO seqembu lakuleli labafana abaneminyaka engaphansi kwengu-20, Amajita, uLuke le Roux oshaye igoli eliqinisekise indawo yaleli qembu koweNdebe yoMhlaba esePoland ngoMeyi, ufunga uyagomela ukuthi bazoyiguqisa iSenegal abadlala nayo namuhla.
Iqembu eliholwa uThabo Senong lizobhekana neSenegal kowandulela owamanqamu namuhla ngo-8.30 ebusuku (ngokwesikhathi sakuleli) eSeyni Kountche Stadium, eNiamey, eNiger.
Iphenathi eshaywe enethini uLe Roux kodlule kubhekenwe neBurundi iyona eqinisekise ukuthi uSenong nabafana bakhe basendleleni ebheke ePoland koweNdebe yoMhlaba yabaneminyaka engaphansi kwengu-20.
Umqhudelwano uzoba phakathi kukaMeyi 23 kuya kuJuni 15 nonyaka.
“Uma ngingakutshela iqiniso elimsulwa, angazi yini ngempela engifakele umfutho ukuthi ngiyicele le phenathi esiwinise kwiBurundi. Bengitatazela ngendlela engachazeki kodwa emqondweni wami bengibuswa wukuthi ukuyibeka kwami enethini kuzoweza hhayi thina abadlali kuphela kepha izwe lonke,” usho kanje ekhuluna kwiSafa.net.
Uqhube wathi: “Ukuzibekisela indawo koweNdebe yoMhlaba iyona into ebesiyizele eNiger. Bengazi ukuthi uma singathola leli goli, iBurundi ngeke isigqobhoze. Ngiswele amaphiko ngenxa yenjabulo.”
ULe Roux ubaqinise idolo bonke abalandeli ngokuthi bazokwenza konke okusemandleni ukunqoba kwiSenegal ngoba uma beya ePoland njengompetha base-Afrika bazoba nalokho kuhlonipheka namanye amazwe angabazeli ngobuso.
“Sikuqonda kahle ukuthi lo kuzoba omunye wemidlalo enzima esesike sayidlala njengeqembu. Noma kunjalo kodwa sesibacubungule sadela ukuthi yini le ebenza (iSenegal) badlale kahle. Ithimba labaqeqeshi selisihlomisile ngalo lonke ulwazi esizoludinga nangabo bonke ubuhlakani obuzodingeka ukuze singene kowamanqamu. Isigaba sokuqala sisiqedile manje. Siyibekile indawo ePoland. Osekusele ukuthi siqinisekise ukuthi siya koweNdebe yoMhlaba singompetha base-Afrika. Akekho owaziyo, mhlawumbe leli golide singase sibuyele nalo ekhaya okuyinto eyoba nkulu kithina nasezweni ngokufanayo,” kusho yena.
Komunye umdlalo owandulela amanqamu, iNigeria izodudulana neMali.