Ungenzeka umlingo koweMagic neChiefs?
UGeorge “Umadl’inyoka” Dearnaley uthemba ukuthi ezakhe iMagic FC zizolandela igama lazo uma sezibhekene neKaizer Chiefs emdlalweni weLast 16 kwiNedbank Cup ngeSonto.
Umdlalo uzogijinywa eNelson Mandela Bay Stadium ngo-3 ntambama emuva kokuthuthelwa e-Eastern Cape ngenxa yokungatholakali kwezinkundla eKapa okuyikhaya leMagic.
“Asinakho nokuncane ukuzikhohlisa ngokuthi sizozenzela kwiChiefs. Lena yimpi yangempela kaDavid noGoliath. Kodwa-ke nathi siyolwa laphaya ngeke sibe yimvu yomhlatshelo. Uma sizimisela, sikhombisa ukuhleleka mhlawumbe kukhona esingakuthola. Into engiyithandayo ngebhola wukuthi kungenzeka noma yini futhi negama leqembu liyasho ukuthi Magic, okusho imilingo eyenzeka ebholeni efana nakho ukuthi iqembu elidlala kwi-ABC Motsepe (League) liqhathwe neKaizer Chiefs kodwa amaqembu o(Orlando) Pirates naMaZulu esephumile,” kusho uDearnaley obamba izintambo ebhentshini abuye abe ngumphathi weqembu.
Ngokwesibili kulandelana ukuthi iChiefs iqhathwe neqembu elidlala kuMotsepe League emqhudelwaneni walo nyaka. Kwi-Last 32 ibambane kwakuncane indawo neTornado FC yase-Eastern Cape. Igcine idlule ngegoli okwaba wumkhonto owagwaze ekhaya. IMagic ishaye iMaccabi ngo 5-4 kumaphenathi.
UDearnaley ucabanga ukuthi lokhu kushikiliswa yiTornado kuwavule amehlo Amakhosi.
“Mhlawumbe thina sisebhadini ngokuthi sidlale nabo ngemuva kokudlala neTornado. Ngeke besasibukela phansi bazofika kithina bevule amehlo.”
Phakathi kwabadlali bakhe ababheke ukuthi bahole iqembu enkundleni ubale uThando Mngomeni oke wagijima kwiSantos neBidvest Wits esigabeni esiphezulu.
NgokukaDearnaley, othenge iqembu ngo-2012, ukudlulela phambili kwiNedbank Cup kuzobajabulisa kodwa akafuni abadlali bakhe bakhohlwe wukuthi ukukhuphukela kwiNational First Division (NFD) yikhona okusemqoka.
“Ngijabule ngokuthi emuva komdlalo odlule weNedbank Cup sinqobe imidlalo emibili elandelile okusibeka endaweni yesibili kwi-log. Nakanjani kumele singene kweyokuhlungela ukuya kwiNFD,” kusho uDearnaley.