Inselelo kaNengomashe kubaphathi beKaizer Chiefs
OWAYEYINJINI yeKaizer Chiefs enkabeni yenkundla, uTinashe Nengomasha, uphosele inselelo abaphathi baleli qembu ukuthi ababukele okuhle okwenziwa ezinye izinkunzi ebholeni lakuleli ukuze kuzobuya izinsuku zenjabulo eNaturena.
UNengomasha waseZimbabwe wayibamba kuMakhosi iminyaka ewu-10, wadlala imidlalo engu-261.
IChiefs isengcupheni yokuqeda isizini yesine ngaphandle kwendebe okuyinto ekhathaza abalandeli bayo. UNengomasha uthe iChiefs idinga ukufunda kokuhle okwenziwa yiMamelodi Sundowns ne-Orlando Pirates. Ubekhuluma nabezindaba ngesikhathi kwethulwa ngokusemthethweni umqhudelwano iCastle 5s eChafPozi, eSoweto ngoMsombuluko.
“Kwesinye isikhathi udinga ukufuna abadlali abakulungele ukudlalela iqembu. Abadlali abangakwazi ukukuwinela izindebe. Ungaletha noma yimuphi umqeqeshi kodwa uma ungenabo abadlali angabasebenzisa ngeke uwine lutho. Ngithemba ukuthi u-Ernst (Middendorp) kukhona azokwenza ngabadlali abakhona, akwazi ukuwina iNedbank Cup. Kodwa kudingeka bathole abadlali abafanele ukudlalela iChiefs ukuze izowina izindebe,” kusho uNengomasha.
Ngesizini ka-2011/2012, uNengomasha ahambe ngayo kwiChiefs, igcine ngokuphakamisa iMacufe Cup. “Kunesikhathi lapho kwenzeke okufanayo kwiMamelodi Sundowns, umqeqeshi uPitso Mosimane wayishintsha indlela okuthungathwa ngayo abadlali. Wabolekisa abadlali abasezinhlakeni zokuthuthukisa ikhono. UPercy Tau wabolekiswa kwiWitbank Spurs wayothola amava, wabuya kwiSundowns wagcina esedlala e-Europe. Lezo ezinye zezinto okufanele bazenze uma bebona ukuthi umdlali unekhono kodwa udinga ukuvuthwa. UThembinkosi Lorch (Pirates) ngangidlala naye kwiCape Town All Stars. Ngazibuza ukuthi uTinkler (Eric) umbolekiseleni ngoba unekhono futhi angaba ngcono ngisho kunoKhama (Billiat). Kodwa mbuke manje, ugcine ebuyile kwiPirates futhi wenza kahle. Ngicabanga ukuthi iChiefs kufanele yenze njalo. Kwesinye isikhathi uma uhluleka udinga ukubuka abanye abantu okwenza baphumelele, ucoshe ukuze kuzokusiza. Ngoba ungabashintsha abaqeqeshi kodwa uma ungenabo abadlali abafanele ngeke uwine lutho,” kusho uNengomasha.
IChiefs izobhekana ne-The Magic emdlalweni weLast 16 yeNedbank Cup ozoba seNelson Mandela Bay Stadium ngeSonto ntambama.
UNengomasha uzohola iqembu labadlali abayisihlanu baseZimbabwe elizodlala emqhudelwaneni iCastle 5s wamazwe ayisishiyagalombili ase-Afrika. Ezinye izingwazi kade kunguSamuel Eto’o waseCameroon, Siza Dlamini waseSwaziland noChristopher Katongo waseZambia. Iqembu elizophumelela lizoyobuka umdlalo webhola omkhulu phesheya kwezilwandle. Nyakenye iqembu eliphumelele libuke umqhudelwano weNdebe yoMhlaba eRussia. Nonyaka uCastle ufake namaqembu abesifazane okuwumkhankaso ozoholwa ngowayengukaputeni weBanyana Banyana, u-Amanda Dlamini.